Аудан әкімі Рамиль Сағандықов «Рухани жаңғыртуға» үн қатты. Елбасы мақаласынан туындаған бағдарламаларды жүзеге асыру Көкпекті ауданында бастау алды. 31 мамыр - саяси қуғын-сүргін және ашаршылық құрбандарын еске алу күні қарсаңында аудан басшысы тарихи орындарды аралап, батыр бабалар рухына тағзым етті. Алаш қайраткері Хамит Тоқтасынов жазықсыз атылған "Қаракезең" асуы, жоңғар шапқыншылығында ел қорғаған Бармақ батыр бейіті, көне заман жәдігері «Қаракезең таңбалы» тастары сынды киелі орындарға сапар жасады.

Рухани жаңғыру ұлттық сананың кемелденуінен көрінеді. Қазіргідей жылдам даму кезеңінде алдымен ұлттық болмысты сақтауға жұмыс істеуіміз қажет. Ұлттық салт-дәстүр, әдебиет, мәдениет, тіл мен діл, бастысы ұлттық рухымыз бойымызда мәңгіге қалу керек. Олардың барлығы - елімізді басқалардан ерекшелеп тұратын басты белгі. Яғни, рухани жаңғырудың негізі ұлттық рух болуы қажет. Елбасы өзінің мақаласында «Туған жер», «Қазақстандағы 100 есім» жобаларын ұсынды. Олардың барлығы рухани жаңғыруға аса қажетті бағдарламалар болып отыр.
Президент «Туған жер» бағдарламасын қолға алу керектігін ұсынды. Мұнда ауқымды өлкетану жұмыстарын жүргізуді, экологияны жақсартуға және елдімекендерді абаттандыруға баса мән беруді, жергілікті деңгейдегі тарихи ескерткіштер мен мәдени нысандарды қалпына келтіру көзделеді. Қысқаша айтсақ, Президент мақаласында «Туған жер» жалпы ұлттық патриотизмнің нағыз ұлттық өзегіне айналатынын жазды.
Сапар барысында Рухани жаңғыру бағытындағы «Туған жер» бағдарламасын жүзеге асыру бойынша болашақ жоспарлар жасалды. Ауданның барлық зиялы қауым өкілдерін, көкірек көзі ояу елжанды азаматтарын туған өлке тарихын түгендеп, болашақ гүлденуіне атсалысуға шақырамыз!

Дархан БЕРДІБЕК

Пікір: