2017 жылдың 6 сәуірінде Шұғылбай ауылында Қазақстан Республикасының Мемлекеттік Рәміздерінің 25 жылдығына, Қазақстан Республикасының Қарулы Күштерінің 25 жылдығына, Алаш қозғалысының 100 жылдығына орай Көкпекті ауданы ауылдық округтер арасында ұйымдастырылған "Қазақстанның көк туы желбірей берсін" атты көркемөнерпаздар байқауы Теректі мен Шұғылбай ауылдық округтері арасында өтті.

Байқауға екі округтің өнерпаздары да аса дайындықпен келіпті. Өнерпаздар тақырыпты, барлық жанрды толық қамтуға тырысты.

Шұғылбай ауылының өнерпаздарының байқауы Н.Макешова оқыған «Қазақтың монологымен» шымылдық ашты. «Отан» әніне дайындалған хор (жеке дауыста Д.Маутказинов), «Қараңғы түнде тау қалғып» акапелласы, (жетекшісі: Д.Айдарханова), Ж.Калиакперованың мың бұралған биі, Алаш қозғалысының 100 жылдығын арқау еткен «Алаш арыстары» көрінісінде Әлихан Бөкейханды сомдаған Т.Мұқатаев, тергеушілерді сомдаған А.Кұнанбаев пен Т.Карменов, Абайдың «Сегіз аяқ», «Қазақ елі» әнімен туған жер төсін тербеген А.Ахмадиева, «Атамекен» әнімен Ж.Самигулина, «Әнім сен едің» әнімен әйелдер вокалы өз өнерімен әділқазыларды тәнт етті.
Аудан көлемінде ұйымшылдығымен аян шұғылбайлықтар, атап кетсек І.Жансүгіров орта мектебінің директоры Ж.Ерботин бастаған ұстаздар қауымы, ауыл тұрғындары және барлық мекеме қызметкерлері байқаудың өтуіне атсалысып, белсенділік көрсетті.
Байқаудың әділқазылар алқасы атынан сөз алған «Нұр Отан» партиясының аудандық филиалы төрағасының орынбасары Г.Ақшабаева барлық қатысушыларға алғыс білдіріп, еңбектеріне жеміс тіледі. Шұғылбай ауылдық округ әкімінің м.а Қ.Алғазинов Шұғылбай ауылының өнерпаздарын өздеріне деген сенімділіктерін арттырып, өнерлерін паш етуге ықпал жасағандығына тоқталып өтті.
Өз кезегінде Шұғылбай ауылының әкімі барша көркемөнер-паздарға алғысын білдіріп, ауызбіршілігіміз арта берсін деген игі тілек айтты.

А.Мұсағазинова, клуб меңгерушісі

Пікір: