Ветеринария, мал дәрігерлік қызмет мал шаруашылығында маңызды орын алады. Өйткені, саланың дамуы осы қызмет түрімен тікелей байланысты. Бұл сала Елбасының тұрақты назарында, қамқорлығында. Қала мен ауылды асыраушы болып табылатын саланы мемлекет тарапынан қолдау тиісті дәрежеде жүзеге асырылып отыр.
Өткен аптаның сәрсенбісі күні Халықаралық эпизоотиялық бюроның келуіне байланысты, осы салада атқарылып жатқан жұмыстарды саралау мақсатында аудан әкімдігінің мәжіліс залында кеңейтілген семинар-кеңес болды. Семинарға-кеңеске аудан әкімінің орынбасары М.Теміржанов, ветеринария бөлімінің басшысы Е.Төлешов, Ветеринариялық бақылау және қадағалау комитетінің Көкпекті аудандық аумақтық инспекциясының басшысы Е.Сәрсенбаев, «Көкпекті мал дәрігері» КГП директоры К.Терин, Республикалық ветеринарлық зертханасы Көкпекті аудандық филиалының директоры Ж.Бауедимов және ауыл әкімдері, округтердегі ветеринар мамандар қатысты.

Жиынды аудан әкімінің орынбасары Марат Қапарұлы ашып, ауданның мал шаруашылығында оңды өзгерістер жасалып жатқандығын, ветеринарлық қызметтің салада жетекші орын алатынын атап көрсетті. Күн тәртібі бойынша кезекті сөз алған Ветеринариялық бақылау және қадағалау комитетінің Көкпекті аудандық аумақтық инспекциясының басшысы Ержан Әділханұлы «Нодулярлы дерматиттің алдын алу, аусыл ауруы және анықтау» туралы баяндама жасады.
-«Ветеринарлық қауіпсіздікті сақтау – адамзат саулығының кепілі», - деп Елбасы халыққа Жолдауында азық-түлік қауіпсіздігін қамтамасыз ету, мал шаруашылығы өнімдерінің экспорттық әлеуетін арттыру және ветеринария жүйесін жетілдіру жөнінде атап айтқан болатын. Сондай-ақ, тәуелсіздік алған жылдардың басында Қазақстан Республикасы Тәуелсіз Мемлекеттер Дербестігі арасында алғаш 1995 жылы, беделді халықаралық эпизоотиялық бюроға мүше болып кірді.
Ауру тіркелген аймақтардан немесе өңірлерден Халықаралық эпизоотиялық бюро және Қазақстан Республикасы мен Кеден Одағы ветеринариялық талаптарына сәйкес, ауруға сезімтал жануарлар, олардың өнімдері мен шикізатының тасымалдануына жол берілмей, шектеу қойылды. Сол себепті, ежелден мал өсіріп, соның өнімін игілігімізге жаратқан елміз. Өсірген малдың басы көбейіп, өрісі кеңіп, ауруы азайып, халқымыз тек қана сапалы өнімді пайдалануға жазсын. Ол үшін ветеринариялық-санитариялық заңнамаларда бекітіліп берілген талаптарды бұлжытпай орындау керек, - деді Е.Сәрсенбаев.
Мұнан соң, жиынды ветеринария бөлімінің басшысы Е.Төлешов жалғастырып, ауылдық округ әкімдеріне ветеринария дәрігерлерімен бірлесіп атқаратын бірқатар жұмыстарды нақтылап айтты. Сонымен қатар, семинар-кеңес барысында Шұғылбай, Теректі, Үлкенбөкен, Көкжайық, Белое ауылдық округ әкімдері көкейдегі сауалдарын қойып белсенділіктерін көрсетті. Ал, аудан көлемінде 185 ірі қара және 393 қой сарып ауруынан ұшыраған Бастаушы ауылдық округ әкімі А.Отаршинаның немқұрайлылығына аудан әкімінің орынбасары М.Теміржанов қатаң ескерту жасады.
Жиынды облыстық аудан әкімінің орынбасары Марат Қапарұлы қорытындылап, малы саудың-жаны сау болатынын, күнделікті тұрмыста мал өнімдері бірінші қажеттілік екеніне тоқталды. Қазіргі таңда Елбасымыздың тапсырмасы бойынша отандық өнімдерге бірінші маңыз беріліп отырғандығын, буферлі аймақтан шығу үшін жоғарыда аталған жұмыстардың барлығы талапқа сай болу керектігін, қазіргі таңда ветеринар мамандардан талап та, сұраныс та жоғары екендігін айтты.

Клара ҚАЙЫПЖАНҚЫЗЫ

Пікір: