Құрметті Көкпекті ауданының тұрғындары!
Қымбатты жерлестер!
Жер-дүниені жаңартып, бусандырып жеткен Ұлыстың Ұлы күні Наурыз – шығыс елдерінің бүкілхалықтық мейрамы құтты болсын! Қазақ халқы Наурыз мерекесін айрықша бағалап, оны жыл сайын үлкен құрметпен есте қаларлықтай тойлауды үрдіске айналдырған.
Күн мен түн теңеліп, күн жылынып, қар еріп, жыл құстары келе бастайтын мерзім. Бұл күні қуанбайтын, шаттанбайтын адам болмайды, өйткені, Наурыз – бірліктің, татулықтың, көктемнің, еңбектің, бақыттың мерекесі болып табылады.

Қазақ халқы үшін, бұл күн - өте қасиетті, киелі саналады. Әрбір қазақ отбасы үшін, Наурыз - жаңа жыл, ырыс-береке, мереке, жыл басы болып есептелінеді. Наурыз мерекесіне байланысты халық арасында жол-жоралар мен әдеп-ғұрыптар қалыптасқан. Адамдар таза киімдерін киіп, бірін-бірі мерекеге арнап дайындалған наурыз көже ішуге шақырады. Наурыз көженің дәстүрлік, мерекелік, ұлттық тағылымы өте зор. Көже ішу – қыс тағамымен, яғни, етпен қоштасуды, ал, құрамына ақтың қосылуы – жаз тағамымен, яғни, ағарғанмен қауышуды білдіреді.
Ол барша халықты татулыққа, бірлікке, жомарттыққа, ізгілікке, ұйымшылдыққа шақырады. Адамдар арам пиғыл, пендешілік атаулыдан тазарып, ар-ожданы алдында тазарады, - деген, ұғым қалыптасқан.
Бұл күні бұлақтар тазартылып, ағаштар отырғызылған. «Бұлақ көрсең, көзін аш!», «Бір тал кессең, он тал ек!», деген сөз осыдан шыққан болу керек. Наурыз - достық, еңбек, бейбітшілік мерекесі. Ұлыстың ұлы күні адамдар бір-біріне деген ренішін ұмытып өзіне де, өзгеге де жақсылық тілеген. Дастарқан басында жастар үлкендердің батасын алған. Бата - үлкендердің өзінен жасы кішілерге беретін ықыласты тілегі. Ақсақалдар: «Ұлыс оң болсын! Ақ мол болсын, қайда барса жол болсын!» - деп бата береді.
Біздің елімізде Ұлыстың Ұлы күні – демалыс күні. Халық арасында мынандай тұжырым қалыптасқан: сапарға шықпау, іс тікпеу, ірі іс бастамау, бір-бірін ренжітпеу және ренжімеу, әбес сөйлемеу, кіржумау, ішімдік ішпеу, өйткені, бұл күні барлық даланы Қыдыр Ата аралайды, - деген ұғым бар.
Құрметті көкпектіліктер!
Сіздерді көп ұлтты еліміздің бірлесе тойлайтын - Достық мерекесімен құттықтаймыз. Ынтымағы жарасқан халқымыздың осы бiрлiгiн ұзағынан сүйiндiргей! Әрбiр шаңыраққа Қыдыр дарып, бақ қонсын! Ұлыстың Ұлы күнi құтты болсын, ағайын!

Р.Сағандықов, аудан әкімі
Т.Сарманов, аудандық мәслихат хатшысы

Пікір: