Халықаралық «ISMA» менталды арифметика (МА) мектебінің оқушылары 12 наурызда Өскеменде өткен облыстық олимпиададан жүлделі оралды. Көкпектілік МА шәкірттерінің арасынан аудандық сайыста чемпион атанғандар және бірінші орын алған 7 оқушы облысқа қатысып, екі Бас жүлде, үш І-орын және екі ІІІ-орын иеленді. Сонымен қоса, Көкпекті ауданының беделін асқақтатқан оқушылар кеуделеріне медальдар тағып, «ISMA» рюкзактарын алды және дипломдармен марапатталды. Келесі кезекте олимпиада жүлдегерлері республикалық кезеңде білімдерін сарапқа салмақшы.

Шәкірттерді облысқа бастап апарған халықаралық «ISMA» МА мектебінің әкімшілік басшысы Гүлжанат Карипчалованың айтуынша, аудан орталығындағы екі мектептен қатысқан оқушылар үздік білімдерін көрсетіп, мақтанышпен ауыз толтырып айтарлықтай мәртебеге қол жеткізді. Атап айтасақ, Нұрай Серікова мен Аймара Айдарханова Бас жүлдегер атанса, Бекзат Аманбаев, Альнура Жанғазина, Муният Шағыбай І-орынды жеңіп алды. Нұрәли Серіков пен Гүлім Ризаева ІІ-орынды қанжығалап, үлкен жетістікке жетті. Бұл жерде МА нұсқаушылары С.Қожабаева, А.Құнапиянова, Г.Карибаеваға жемісті еңбектері үшін ата-аналардың дән риза екенін айта кеткен жөн.

Жеңімпаздарға талаптарыңа нұр жаусын, келесі сатыдан сүрінбей өтіп, халықаралық жарыстарға жолдама алуларыңа тілектеспіз дейміз.

Бақыт МҮЛІКОВА

Пікір: