Ағымдағы жылдың 9 қаңтарында Көкпекті ауданының әкімі Рамиль Нығметжанұлы Сағандықов әкімдік аппаратының жауапты қызметкерлерінің қатысуымен азаматтарды жеке қабылдау өткізді.

Естеріңізге сала кетейік, бекітілген кесте бойынша, Көкпекті ауылында әр айдың бірінші дүйсенбісі 15.00-ден 18.00 дейін, Самар ауылында, әр айдың бірінші сәрсенбісі 15 .00-ден 18.00-ге дейін аудан әкімі тұрғындардың жеке сұрақтары бойынша қабылдау өткізіп, онда аудан азаматтары әкіммен өздерін мазалаған мәселелер жөнінде ой бөлісіп, тиісті орындардан жауап ала алады.
Қабылдауға келген Тассай ауылдық округінің кәсіпкер азаматы Қанат Тілебалдиннің өтініші мал бордақылау алаңын салудағы құжаттарды ресімдеу кезінде туған мәселелер төңірегінде болды. Бұл мәселелердің шешімін жіті қадағалауды ауылдық округ әкімі Е.Мазыбаев және Көкпекті ауданының сәулет, құрылыс, тұрғын-үй коммуналдық шаруашылығы, жолаушылар көлігі және автомобиль жолдары бөлімінің басшысы М.Қапшықовқа тапсырды.
Сондай-ақ, қабылдауда Көкпекті ауылының тұрғыны, зейнеткер Бисағи Рахимжанова тыл еңбеккерлеріне берілетін жәрдемақы жөнінде түсініспеушілігін білдірді. Зейнеткердің өтінішін аудан әкімі жұмыспен қамту және әлеуметтік бағдарламалар бөлімінің басшысы Бақыт Оразғаливаға тапсырды.
Қабылдау соңында аудан әкімі Рамиль Нығметжанұлы тұрғындар тарапынан қойылған сұрақтардың шешімін жан-жақты қарап, кейбір мәселелерді әкім аппаратының жауапты қызметкерлері мен аудандағы мекеме басшыларының құзырына белгіленген уақыт мерзімінде орындауды қадап тапсырды.

Клара ҚАЙЫПЖАНҚЫЗЫ

Пікір: