Елбасы Н.Назарбаев жыл сайынғы Жолдауында халықтың әл-ауқатын жақсартуға және жұмыссыздықты мейлінше азайтуға баса мән беріп келеді. Бұл ретте, Үкіметтің «Жұмыспен қамтудың жол картасы – 2020» бағдарламасы ел игілігіне қызмет жасауда.
Биыл аталмыш бағдарламаның аясында біздің ауданда ауқымды жұмыстар атқарылуда. Бұл бағдарламаның екінші бағыты жеке кәсібін ашып, екі қолға бір күрек табам деушілерді қаржылай қолдауды көздейді. Аталмыш бағыт бойынша берілетін несиенің шарттары да өте тиімді. Несиенің пайыздық үстемеақысы төмен, несие бірнеше жылға қарастырылған. Осындай мүмкіндіктерді ұтымды пайдаланып отырған кәсіпкерлер біздің ауданда жетерлік. Солардың бірі Теректі ауылының тұрғыны Рымғайша апай.

- Мал басын көбейтуді көптен бері ойлап жүрген едік. Онсыз тағы болмайды. Ауылда тұрған соң, мал ұстамау біз үшін жат нәрсе. Қора-қопсымыз кең, малға жайлы. Сондықтан, мемлекеттік бағдарлама арқылы 3 млн. теңге несие алып, 11 бас ірі қара сатып алдық, - дейді.
Қазіргі таңда жеке кәсібін ашуға ниет еткен жандарға тосқауыл жоқ. Тек аянбай еңбек ету керек, сонда ғана кәсіптің жемісін көруге болады. Сонымен қатар, Рымғайша апай, көп балалы ана - Алтын алқа иесі, отағасы Дауылбек аға екеуі 7 бала,11 немересінің қызығын көріп отыр. Береке бірлігі ұйыған өнегелі отбасының шаңырақ көтергеніне биыл 34 жыл.
- «Жұмыспен қамтудың жол картасы – 2020» бағдарламасының ауылда тұратын біздер үшін маңызы зор. Мемлекет тарапынан осындай қолдау-көмек барда, кәсіпкерлікпен айналысам деушілерге мүмкіндік мол, - дейді отағасы Дауылбек аға. Күн өткен сайын табысы молайған кәсіп-керліктің ғана болашағы жарқын, несібесі мол болмақ. Бұл қағиданы Турдиндер отбасы да жақсы түсінеді. Сондықтан да келешекте шағын кәсібін одан әрі кеңейтуді жос-парлап отыр. Міне, Рымғайша апай мен Дауылбек аға несие алып, мал шаруашылығымен айналысып, кәсіптерінің нәсібін көріп отыр. Олардың басты мақсаты – мал басын көбейтіп, ауыл шаруашылығының дамуына үлес қосу.
Ел дамуына өз үлесін қосып, еңбек етіп қазірдің өзінде заман талабына лайық кәсіппен несібелерін тауып отырған бұл отбасының тынымсыз еңбегінің нәтижесін көріп, іштей қатты риза болып қоштастық.

Пікір: