Отан қорғаушы! Қандай қасиетті де құдіретті сөз. Өзін ер-азаматпын деп санайтын кеудесінде намысы, жүрегінде оты бар әрбір жан үшін ең басты парыз, ең басты адами міндет – осы.
1992 жылы 7 мамыр – Отан, мемлекеттік мүдде, саяси қауіпсіздік пен дербестікті қорғайтын Отан қорғаушылар күні деп аталды. Бұл күн – бейбіт елдің тыныштығын әуеде, құрлықта, теңізде қорғап, өз тағдырын ел тағдырымен байланыстырып жүрген әрбір әскери қызметші үшін ерекше күн. Еліміздің Президенті, Жоғары Бас қолбасшы Н.Назарбаев: «Отаншылдық рухы қай заманда да қазақ халқының бойындағы айрықша қасиет болып табылған. Сондықтан әскерилердің бойындағы патриоттық сезімдерін нығайтып, өсер ұрпақ ғибрат аларлықтай, үлгі тұтарлықтай, ержүрек, намысшыл, адал, қайсар мінезді сарбаздар тәрбиелеу міндетіміз», - деп атап өткен болатын. Ендеше, біз, өскелең ұрпақтың бойына патриоттық рухты дарытуға барынша ынта қоюымыз қажет. Ұлы Отан соғысына қатысып, елімізді жаудан қорғаған ардагерлеріміздің ерлігі, үлгісі арқылы тәрбиелеуге барынша назар аударған абзал. Кешегі күні интернационалдық борыштарын атқарған Ауған соғысының жауынгерлерінің де жастарға патриоттық тәрбие беру жолындағы еңбектері айтарлықтай болып отыр.
Құрметті Отан қорғаушылар, ардагерлер, сіздерді осы айтулы мерекемен шын жүректен құттықтаймыз! Ел іргесі тыныш болып, ата-бабадан қалған ұлан-ғайыр еліміздің шекарасы әрқашанда мықты болсын! Отан қорғаушы – ардақты мамандық, ел сенімін адал ақтау азаматтық ісінде сәттіліктер тілейміз!

Р.Сағандықов, аудан әкімі
Т.Сарманов, аудандық мәслихат хатшысы

Пікір: