Қазіргі уақытта еліміздің алдында тұрған ең басты мәселенің бірі – бәсекеге қабілетті елу мемлекеттің қатарына кіру стратегиясы болып табылады. ХХІ ғасыр – бәсеке ғасыры, ол енжарлықты көтермейтін ғасыр. Сондықтан әлемдік бә-секелестіктің жылдам дамуына ілесе алатындай білімді де тапқыр дара тұлғаның тағдыры мұғалімдердің қолында. Білімді ұрпақ тәрбиешісі – ұстаздар.

Өзгеріп жатқан өмірде өмір көшінен қалыспай, заманымен қатар адымдауы үшін, біліктіліктерін арттырып, деңгейлік бағдарламаларды меңгеріп, мұғалімдер үшін жасалып жатқан зор мүмкіндіктерді тиімді пайдаланып отырған мектеп ұжымы – Үлгілімалшы ауылындағы Абай атындағы мектеп-балабақша кешені. Аталмыш білім ордасына ат басымызды бұрған кезде мектептің 8 жыл бойы тәрбие ісі жөніндегі орынбасары, 1 санатты ұстаз Сәнияр Ысқақызы Айжақсина қарсы алып, мектептің тыныс-тіршілігін баяндап берді:
- Жаңашылдыққа құштар педагог қызметкер, мұғалімдер қандай қиындық кездессе де, білімі мен өнегесін ел келешегі - жас ұрпақты бәсекеге қабілетті тұлға ретінде дамытып, тәрбиелеу үшін оқыту тәжірибесіне өзгеріс енгізуге, жетілдіріп іске асыруға күш салуда. «Өмір бойы білім алу» қағидаларын жүзеге асыру, міндеттерін орындау – мұғалімдер мен мектеп басшыларының жұмысы мен біліктілігіне байланысты. Қазақстандағы 30 жетекші мектептердің бірі ретінде «Жаңартылған білім мазмұнын апробациялау» оқыту-тәжірибе мектебі болып жаңа оқу жылын бастады.
2015-2016 жаңа оқу жылында 1-сынып оқушылары сынып жетекшісі Баршагүл Мейрембаева жаңартылған білім бағдарламасы бойынша Назарбаев Зияткерлік мектептерінің іс-тәжірибесін тарату мақсатында апробациядан өтуде. 1 сыныпқа сабақ беретін пән мұғалімдерімен ата-аналар ұйымдаса, бір кісідей жұмыла, жауапкершілікпен жұмыс атқаруда. Бастауыш сыныптың материалдық-техникалық базасы да, жаңа талапқа сай жаңаруда. Даярлық және 1 сынып оқушылары 3 тілде компьютер «Сөйлейтін қалам», әр түрлі әдістемелік бейнетаспалар арқылы білім алуда. Аталмыш сыныпқа дәріс беретін Б.Мейрембаева, Г.Кемербаева, Ж.Сүйіндікова, Г.Ахметқалиева, Г.Рахимова, Д.Ганиевтердің заманауи жаңа әдіс-тәсілдермен өткізген әр сабағы мен күнделікті тынымсыз еңбектерін айтпау мүмкін емес, - деді Сәнияр Ысқаққызы. Сонымен қатар, ол мектептегі тәрбие жүйесіне де тоқталып өтті:
- Мектебіміздің сынып жетекшілері Назарбаев Зияткерлік мектебіне барып, кураторлық және шаңырақ сағаттарына қатысып, кураторлардың өткізген әр түрлі тренингтерінен тәжірибе алмасады. Ал, апробациядан өтіп жатқан 1 сынып оқушылары тәрбие саласы бойынша ашық сынып сағаттарын, сыныптан тыс шараларын үш тілде өткізіп, ата-аналармен тығыз қарым-қатынас жасауда. - деп сөзін аяқтады.
Білім берудің күрделі міндеттерін рухани бай, педагогикалық дарыны бар, шығармашылық, кәсіби тәсілдерді жетік меңгерген және жаңалыққа құштар жан-жақты тұлға ғана шеше алады. Сіздердің осы бағыттағы еңбектеріңіз жана берсін! «Ұстаз бақыты - озып туған шәкірті» десе, аттарыңызды бүкіл елімізге паш ететін талантты да білімді шә-кірттеріңіз көбейе берсін!

КЛАРА ҚАЙЫПЖАНҚЫЗЫ

Пікір: