Қыстың өз қызығы бар. Бәрінен де қысқы ойындарды айтсаңшы! Шанамен сырғанап, шаңғы, коньки теуіп, қармен атысып, аққала жасау балаларды ерекше қуанышқа бөлейді. Қыстың ызғарынан жасқанып, үйде отырған баланы көрмейсің, бәрі де шаттана, мәз-мейрам сыртта ойнап жүргені. Бұл әрі ойын, әрі балаларды шынықтырады, денсаулыққа да өте пайдалы. Біздің аудандағы қысқы спорттың түрі шайбалы хоккей ойыны да даму үстінде.

Шайбалы хоккейге қызығушылар да баршылық. Осыған орай, біздің ауданда хоккей қорапшалары құрылып, ойын алаңдары салынғаны аян. Қысқы ойындардың бірі - шайбалы хоккейге қызығушы жас жеткіншектердің саны жетерлік. Биылғы қысқы ойындар маусымының тұсаукесері Үлкенбөкен ауылында Тәуелсіздіктің 25 жылдық мерейтойымен қатарлас ашылды. Бұл спорттық ойын аудан көлемінде өткен «25 жұлдызды күн» мерекелік шараның соңғы нүктесін қойды.
Шайбалы хоккейдің ашылу салтанатына 6 команда келіп, бақ сынасты. Олар Абай атындағы орта мектеп (Үлгілімалшы ауылы), Көкпекті орта мектебі (Көкпекті ауылы) Қ.Аухадиев атындағы орта мектеп (Теректі ауылы), Көкжайық орта мектебі (Көкжайық ауылы), Амангелді орта мектебі (Мамай ауылы) және Үлкенбөкен орта мектебі қатысты.
Мектеп оқушыларының мұз үстіндегі әдемі биімен ойыншылар мұзға шықты. Мұз үстіндегі шайбалы хоккей додасы өз мәресіне жетті. Ойын қорытындысы бойынша жоғарғы топ ойыншылары арасында 1 орынды Абай мектебі, екінші Үлкенбөкен мектебі, үшінші Қ.Аухадиев мектебі, төртінші Көкпекті мектебі, бесінші Көкжайық мектебі, алтыншы орынды Амангелді орта мектебі алды.
Ал, ортаңғы топ бойынша 1 орынды үлкенбөкендіктер алып, 2 орын үлгілімалшылық ойыншыларға тиесілі болды. Мұз үстіндегі бұл жарыста ең кіші топта ойын көрсеткен Үлгілімалшы командасы алғашқы орынға шығып, үлкенбөкендік жеткіншектер екінші орынды місе тұтты. Барлық ойыншылар бүгінгі жеңістерін Тәуелсіздіктің 25 жылдығына арнады.
Мұз үстіндегі спорт - шайбалы хоккейден ойын көрсеткен жеткіншектер аудан әкімінің мадақтама қағаз-дарымен марапатталды.

Клара ҚАЙЫПЖАНҚЫЗЫ

Пікір: