Өткен аптада облыс қалалары мен аудандарында тұңғыш рет А.С.Пушкин атындағы облыстық кітапхананың ұйымдастыруымен «Патриотизм – ұлттық рух» тақырыбы аясында ашық диктант өткізілді. Қазақстандықтардың сауатты жазу мәдениетін дамытуға арналған білім акциясын өткізудің мақсаты - кез келген адамның өзінің сауаттылығын тексеруіне мүмкіндік беру, сондай-ақ заманауи қоғамда сауаттылықтың маңыздылығын атап өту.

Сауатты адам – бұл ең алдымен мемлекеттік міндетті іскерлікпен орындайтын, мемлекеттік тілді толық меңгерген сауатты басшы, мемлекеттік қызметкер, заңгер, мұғалім, дәрігер және басқалар. Өйткені, Қазақстандық ұмтылыс, сапалы білім мен сапалы өнімнің түкпірінде Отанға деген сүйіспеншілік, өшпейтін патриотизм, қазақи намыс, Мәңгілік ел идеясы жатыр. Сондықтан да тұңғыш диктантқа «Желтоқсан құрбандары – Тәуелсіздіктің алғашқы қарлығаштары» тақырыбы таңдалған.

Көкпекті аудандық кітапханасындағы онлайн орталықта ел Тәуелсіздігі мерекесіне орай өткен ашық диктантқа жасы, білім деңгейі, қызметі жағынан әртүрлі оннан аса адам қатысты. Онлайн режіміндегі ашық диктанттың модераторы – Назарбаев зияткерлік мектебінің тәжірибелі ұстазы, қазақ тілі мұғалімі Мұқатаева Гүлназ Қадырқызы диктант талабына сай мәтін сөйлемдерін түсінікті де анық етіп, мәнерлеп оқып берді.

Диктант нәтижесінде айқындалған жеңімпаздарға ынталандыру сыйлықтары ұсынылатын болады. Оның қорытындысы кітапхана сайтында www.pushkinIibrary.kz жарияланады. Алайда, есту арқылы бір рет жазылған диктантты қайта көшіріп жазу орын алған жағдайда қалайша әділ нәтиже шығатынын кім білсін?! Бұл, бәрінен бұрын, өзін өзі алдау, көзбояушылыққа жатпай ма?

Бақыт МҮЛІКОВА

Пікір: