Қасиетті Рамазан айы тек ораза ұстаумен шектелмейді. Бұл айда рухани тазару, айналаға рақымшылықпен қарау да сауап болмақ. Сондай игілікті істі Шығыс Қазақстан діни басқармасы да атқарып отыр. Биыл Көкпекті ауданының бірнеше елді мекенінде, атап айтқанда Көкпекті, Бастаушы, Көкжыра, Ақой, Үлкенбөкен, Тассай, Үлгілімалшы, Көкжайық және Самар ауылдарындағы мешіттерде балалар мен ересектерге арналған тілашар сабақтары өтуде.

Самар ауылындағы мешітте жиырмаға жуық бала ұстаздары Серік Керуеновтан білім алуда. Марқакөл өңірінің тумасы Серіктің наиб имам дипломы бар. Имамдардың білімін жетілдіру институтын тәмәмдап, үшінші дәрежелі куәлік алған. «Біздің діни басқармада 2020 жылға дейінге арналған бағдарлама жасалған. Сол бағдарлама негізінде жазғы каникул уақытында және жылдың қай мезгілінде болмасын балаларға, ересектерге діни сауат ашу сабағын өткізуді қолға алған», - дейді Серік имам.
Балалар мұнда тек діни сауаттарын ашып қоймай, бір уақыт бой сергітуге шығады, мешіт имамы Бекболат қажы оларға балмұздақ алып береді екен. «Біз қазір араб тіліндегі әліпбиді жаттап болдық. Енді сүрелерді, аяттарды өзіміз оқып жаттайтын боламыз»,-дейді шәкірттер. Мешітте бұрыннан бері сауаттарын ашып, Құран Кәрімді жатқа айтатын балалар ауданда ұйымдастырылатын қарилар жарысына дайындалып жүр.

Клара НҰРПЕЙІСОВА

Пікір: