8 тамыз күні Самар ауылындағы Мәдениет үйінде ауданымыздың  жол-құрылыс саласында еңбек ететін құрыш білек құрылысшылар мен сала ардагерлері бас қосты. Оларды құттықтауға басқа да мекеме, ұжым өкілдері қатысты. Өйткені, олардың барлығының да құрылысшыларға  алғысы шексіз. Аудан мен ауыл көлеміндегі барлық әлеуметтік, шаруашылық, өндірістік нысандар құрылысшылардың еңбегімен тұр-ғызылғаны белгілі.

 Бүгінгі мереке иелерін аудан әкімінің атынан оның орынбасары К.Смаилова құттықтады. – Сіздердің еліміздің экономикасына қосып отырған үлестеріңіз орасан зор. Құрылысшы - мәртебелі мамандық. Бүгінгі күні еліміздегі тұрғызылып жатқан алуан түрлі құрылыс нысандары ауыл, қалаларымызға көрік беріп қана қоймай, халық қажетіне қызмет өтуде. Еліміздің бас қаласы Астананың, ЭКСПО көрмесінің құрылысы да сіздердің еңбектеріңіздің жемісі.

Елбасы қашанда құрылысшылардың жұмысын жоғары бағалайды. Құрметті құрылысшылар, сіздерді мерекелеріңізбен құттықтап, зор денсаулық тілейміз, Республикамызда көрікті нысандар, тегіс те түзу жолдар көбейе берсін деп тілейміз, - деді Клара Рафикқызы.

«ЖҚБ-14», «Ашим-С», «Қазақавтодор», «Көкпекті Жолдары» жауапкершілігі шектеулі серіктестіктерінің басшылары мен бірқатар жұмысшылары, жүргізушілері бұл күні сый-сияпет пен марапаттауларға ие болды. Олардың арасында «ЖҚБ-14» ЖШС атқарушы директоры А.Калинин, жұмысшылары А.Дегтярев, З.Сқақов, А.Каленов, Е.Бұлышев, «Көкпекті Жолдары» ЖШС басшысы Г.Нұрғалиева, қызметкерлері О.Вишняков, А.Ушаков, ТҮКШ және құрылыс бөлімінен Б.Сәменов, Е.Базарбаев, Н.Шалбаев, округтерінде құрылыс жұмыстарын жүргізуге мүдделі болып, инвестиция тарта білген округ әкімдері М.Қапшықов, К.Сақуанова, М.Жанкебаев, Ш.Шайырғазина және басқа да азаматтар аудан әкімінің Құрмет грамоталары мен Алғыс хаттарына ие болды. Ауданның байырғы сәулетшісі В.Гладышев, жол құрылысы саласының майталманы А.Вайс және басқалары да назардан тыс қалмады. Сонымен бірге саланың бірқатар мамандары аудандық құрылыс және ТҮКШ бөлімінің марапаттарына лайықты деп танылды. Оларға сыйлықтарды бөлім басшысы Б.Бекенов табыс етті.

Мерекелік  жиын соңы ауданымызға белгілі өнерпаздардың концертімен жалғасты. Құрылыс саласының майталмандарының алдында Ш.Ибраев, Т.Нечаева, «Забава» ансамблі және басқалары өнер көрсетті.

Клара НҰРПЕЙІСОВА

Пікір: