Талғат Манапұлы Сарманов, аудандық мәслихаттың хатшысы:
- Елбасы мақаласын оқып шыққан соң біршама ой орамдарымен бөлісуді жөн көрдім. Кез келген басшы ең алдымен ел бірлігін ойлары хақ, ал елдің іргетасын қалаған Тұңғыш мемлекет басшысының халқын қиын кезеңде бірлікке шақыруы бөлек әңгіме. «Жау жоқ деме – жар астында, ауру жоқ деме – аяқ астында». Міне, елде сондай жағдай болып тұр. Төтенше жағдай жариялауға мәжбүр етті, әрине індет бізді ғана емес, бүкіл әлем жұртын дүрбелеңге салды, оны көз көріп отыр. Осындай қиын-қыстау кезеңде ақсақалдарға, орта буынға және жастарға, әр топтың өкілдеріне Елбасымыздың жеке сөз арнауы тегін емес. Сөз қадірін түсінетін, түйсінетін елдің ұрпағына және бізбен етене ғұмыр кешіп келе жатқан басқа ұлт өкілдеріне қарата айтылған деп ойлаймын. Ұлы даналардың орнымен пайдаланған нақыл сөздері мен ақылдары, өмірдің өзінен алған түйіндемелері көпшілікке ой салуға тиіс.
Әрқашан қолында барымен бөліскен халықпыз және аталы сөзге тоқтаған елдің ұландарымыз. Бірлікке шақырған Елбасы сөзі көңілге қонады, жүрекке жетеді. Біз біргеміз!

Нұрсұлтан НАЗАРБАЕВ,
Қазақстан Республикасының Тұңғыш Президенті – Елбасы

Тәуелсіздік жылдары ел өмірінің ең қиын да күрделі кезеңдерінде мен кез келген мәселені қадірменді отандастарыммен бірге бүкпесіз, ашық талқыға салып, туған халқыммен үнемі ой бөлісіп келемін. Бүгінгідей бүкіл әлем алаң күй кешіп, ұлт саулығы сынға түскен қазіргі сәтте де баршаны сабырға, байсалдылыққа шақырып, тағы да жұртыма ақ тілеулі сөзімді арнағалы отырмын.

Тұтқиылдан келген жаман індет – коронавирус дерті барша адамзатқа қауіп-қатер төндіруде. Қазірдің өзінде дүние жүзі бойынша 1,4 миллионнан астам жан осы сырқатқа шалдығып, ондаған мың адамның өмірі қиылды. Сондықтан әлем мемлекеттері қатерлі дертке бірлесе дауа іздеп, бүгінгі заманның бар күш-қуатын, ақыл-ойы мен ғылым-білімінің жетістігін ортақ мақсат жолына бірлесе жұмылдырып, ынтымақтаса әрекет етуде.