Гүлназ Құдайбергенқызы Нұрғалиева, «Көкпекті жолдары» ЖШС басшысы, аудандық маслихаттың депутаты:
Мемлекет басшысы Қасым-Жомарт Тоқаевтың 16 нау-рыздағы кезекті Жолдауының тарихи маңызы өте зор. Мемлекеттік құрылымның жаңа кезеңі бүгіннен басталды десек болады. Жергілікті өзін-өзі басқару жүйесін дамыту бағытында жасалған қадамдар, мәслихаттар құзыретін арттыру бастамалары жергілікті мәселелерді оңтайлы шешуге ықпал етеді деп сенемін. Жолдауда адам құқықтарын сақтау, тұрақтылық пен дамуды қамтамасыз ету мәселелері қамтылды. Президент «Өзіңнен баста» деген тапсырмасының іске асырылуын өзі бірінші көрсетіп отыр. Атап айтқанда, өкілеттіктерді қайта бөлу, жақын туыстарды саяси лауазымдарды атқарудан шектеуі және Президент пен облыс басшылығының деполитизациясы. Мәжіліс құзыретінің артуы, сондай-ақ сайлаудың ішінара мажоритарлық жүйесін енгізу және әкімдердің сайланбалылығын енгізу. Президент бұрын жариялаған саяси реформалардың іс жүзінде жүзеге асырылып жатқанының айқын көрінісі. Осы жұмыстарды атқаруда жалған ұраннан, жалаң сөзден аулақ болу керек. Қазақстанда жаңадан үш облыс ашылады: Абай, Ұлытау және Жетісу. Бұл көпшілікті қуантқан жағымды жаңалық болды. Әсіресе, тұрғындары облыс орталығынан шалғай жатқан өңірлер үшін маңызды. Президент шешімі халық саны, даму әлеуеті, басқа да себептер ескеріліп қабылданды деп ойлаймын.

Қымбатты отандастар!

Қадірлі қауым!

Бүгінгі Жолдаудың мән-маңызы  айрықша. Оның арқалайтын жүгі бір жылмен шектелмейді, ауқымы кең, мазмұны да  бөлек. Біз  алдымызға  биік мақсаттар қойып отырмыз. Өздеріңізбен бірге Жаңа Қазақстанды құруға кірістік.

Баршаңызға мәлім, былтыр  егемендіктің маңызды белесіне жеттік. Тарихи өлшеммен қарағанда  30 жыл  тым көп уақыт емес. Халқымыз  Тұңғыш Президент Нұрсұлтан Әбішұлы Назарбаевтың басшылығымен осы кезеңде ауқымды жұмыс атқарды, көптеген табыстарға қол жеткізді.  

Алайда, береке-бірлігімізді сақтамасақ, жетістіктеріміздің бәрінен айырылып қалуымыз мүмкін. Қаңтардағы дүрбелең кезінде бұған көзіміз анық жетті. Бұл оқиғалар бүкіл қоғамды дүр сілкіндірді. Халқымыз бұрын-соңды болмаған қауіп-қатермен бетпе-бет келді. Мемлекетіміздің тұтастығына және егемендігімізге зор қауіп төнді. Осы күндерде жұртымыз Тәуелсіздіктің қадір-қасиетін жан-жүрегімен сезінді. Татулық пен тұрақтылық, тыныштық пен бейбітшілік  қаншалықты маңызды екенін жете түсінді.