Ауыл әкімдерінің тұрғындар алдында есеп беру кездесулері Көкпекті ауданында 17 ақпан күні басталды. Бұл күні Шұғылбай, Теректі және Қойгелді Аухадиев атындағы ауылдық округ әкімдері халық алдында атқарылған жұмыстардың есебін беріп, жоспарланған жобалармен таныстырды. Есептік кездесулерге аудандық мәслихат хатшысы Талғат Сарманов, аудан әкімінің орынбасары Дәурен Қойгелдин, аппарат басшысы Талант Бақытбекұлы, аудандық мәслихат депутаттары Владимир Виничук, Гүлназ Нұрғалиева және Гүлнұр Садыкова қатысты.

Ауылды сақтап тұрамыз десек...

Шалғайдағы шағын ауыл Шұғылбайдағы кездесу сұрақ-жауап форматында өрбіді. Ауылдық округ әкімі Ержан Күзембаевтың есептік баяндамасы аудандық газетте жарияланған. Слайдта көрсетілген нақты ақпараттарды, қордаланған мәселелер мен олардың шешу жолдарын атап керсету арқылы ықшам да түсінікті есеп берген округ әкімінің сөзін тұрғындар асқан ықыласпен тындап отырды. Баяндама аяқталған соң кездесуге келген әрбір тұрғын өзін толғандырған мәселесін көтеруге, пікірі мен ұсыныстарын ортаға салуға мүмкіндік алды.

Үлгілімалшы ауылдық округі аудан орталығынан 82 шақырым  қашықтықта орналасқан.  Жер аумағы 129 190 га құрайды.  Округте аула саны 273. Халық саны 1132 адамды құрайды,  оның ішінде экономикалық белсенді халық 608 адам, 16 жасқа дейінгі балалар 275. 2021 жылы  дүниеге 25 сәби келдіп. 

Ауыл шаруашылығы

       Жыл сайын мал басының өсу қарқыны байқалады.  2021 жылдың 1 қаңтарына  8040 бас ірі қара (109,3 пайыз өсім),  қой-ешкі 7859 бас (106,1 пайыз өсім), жылқы 2775 (146 пайыз өсім)  тіркелген.