Жас ұрпақты білім нәрімен сусындатып, шәкірттерінің жүрегіне гүл егетін бала жанының бағбаны аяулы ұстаздар. Осы жылы алғаш рет мұғалімдер күні мерекесі 5 қазанда мерекеленді. Осылайша дүниедегі ең асыл, жауапты әрі маңызды мамандық өкілдерін біріктіретін бұл мереке - Дүниежүзілік мұғалімдер күнімен сәйкестендірілді.
Естеріңізге сала кетейік, тиісті қаулыны Қазақстан Республикасының Үкіметі қабылдаған болатын.
Мұғалімдердің кәсіби мерекесіне арналған салтанатты шара аудандық мәдениет орталығында өткізілді. Аудан көлемінде ұйымдастырған шараға аудан басшысы Ділдәбек Оразбаев, аудан әкімінің орынбасары Марат Теміржанов, саналы ғұмырын білім саласына арнап, шәкірттерін білім шыңына бастаған озық ойлы ардагер ұстаздар, мұғалімдер, мектепке дейінгі білім беру мекемелерінің басшылары мен тәрбиешілері, қосымша білім беру саласының мамандары қатысты.

Мерекелік шара қонақтары үшін фойе залында мектептердегі өткізілетін ғылыми жобалар, өткен оқу жылындағы оқушылардың білім-ғылым, өнер және спорттағы қол жеткізген жетістіктер көрмесі қойылды. Аудан басшысы көрмені тамашалау барысында балалардың әртүрлі тақырыпта жазылған ғылыми жобаларымен танысып, зейін қойып тыңдады.
«Мұғалім – мектептің жүрегі» атты ұстаздар күніне арналған мерекелік шара қазақтың үш бәйтерегі аталатын Сәкен, Ілияс, Бейімбек моногымен ашылды. Көкпекті орта мектебі оқушылары үш тілде әдеби-музыкалық монтаж оқып, аудандық оқушылар шығармашылық сарайы тәрбиеленушілерінің орындауында «Болашағы біз елдің» хоры орындалды.
Салтанатты шарада аудан басшысы Ділдәбек Тәжібайұлы мерекелік лебізін жеткізді. Өз сөзінде барша өңір ұстаздарын құттықтаған аудан әкімі оларға қастерлі қызметіне сәттілік, еңбектеріне табыс тіледі.
- Ардақты білім саласының ардагерлері және құрметті ұстаздар! Сіздерді кәсіби мерекелеріңіз Ұстаздар күнімен шын жүректен құттықтаймын.
«Ұстаз – ұлағатты есім». Адам баласын білім нәрімен сусындатып, тәлім-тәрбие беріп, адами қасиеттерді шәкірт бо-йына дарытуда адамгершілік рухта бағыт-бағдар беруде ұстаздың еңбегі орасан. Ауданда білім саласына айрықша көңіл бөлудің нәтижесінде білім мекемелерін көркейту және олардың материалдық-техникалық базасын заманауи қондырғылармен жабдықтау арқылы білім саласын дамытуға жыл сайын барлық жағдай жасалып келеді. Ауданымызда 25 білім беру мекемелерінде 540 астам ұстаз білім береді. Оның ішінде зерттеуші санатында – 114, сарапшы санатында – 174, модератор санатында – 134 еңбек етеді.
2023 жылы ауданның білім жүйесінің бюджеті 4900,0 теңгені құрады. Бұл былтырғы жылмен салыстырғанда 35 % артып отыр. Ағымдағы жылы 230 млн.теңгеге 10 білім беру мекемесіне ағымдағы жөндеу жұмыстары жүргізілді. Алдағы уақытта балабақшалардың құрылысы салынып, мектепке дейінгі мекемелерге балалардың баруы мәселесі шешімін табатын болады.
Осы жылдар ішінде мектеп мұғалімдерінің жалақысы өсті. 2023 жылдың 1 қаңтарынан бас-тап мұғалімдердің жалақысы тағы 25 пайызға көтерілді.
Биылғы қыркүйек айынан бас-тап мектепке дейінгі ұйымдарда еңбек ететін педагогтердің жалақысы тағы 30 пайызға өсті. Осының бәрі мемлекетіміздегі білім беру саласына көңіл бөлінуінің арқасында іске асырылып жатқан шаралар деп білеміз. – деді өз құттықтауында Ділдәбек Тәжібайұлы.
Мерекеге арналып ұйымдастырылған салтанатты шарада аудан әкімі Ділдәбек Тәжібайұлы өскелең ұрпаққа білім мен тәрбие берудегі орасан еңбегі үшін Қазақстан Республикасының Оқу-ағарту Министрінің Алғыс хаты, Абай облысы әкімінің Құрмет грамотасы, Абай облысы әкімі аппарат басшысының Алғыс хаты, облыстық білім басқармасының Алғыс хатын құрметпен марапат иелеріне табыстады.
Ұстаздар мерейін үстем еткен кеште аудандық оқушылар шығармашылық сарайының өнерпаздары мен Қалихан Алтынбаев атындағы мәдениет орталығының әншілері сахна төріне көтеріліп, ұстаздар қауымына деген алғысын әнмен білдірді.
Құрметті ұстаздар! Шәкірттеріңіздің құрметі мен махаббатына бөлене беріңіздер. Шығармашылық ізденістеріңіз бен ғылыми жаңалықтарыңыз арта берсін. Мерекелеріңіз мерекеге ұласып, мерейлеріңіз үстем болсын.

Пікір: