18 шілде күні аудан әкімі Ділдәбек Оразбаев асфальт жол салу жұмыстары басталған Толағай ауылына жұмыс сапарымен барды. Мердігер ұйым “Көкпекті жолдары” ЖШС басшысы Гүлназ Нұрғалиевамен бірге жұмыс барысымен танысты. Аудан басшысы асфальт төсеу жұмыстарының қарқыны мен сапасын көріп, сапалы атқарылуына баса назар аудару керектігін тапсырды.

Қазіргі уақытта 2.8 шақырым жолға асфальт салу жұмыстары орындалды. Жоспар бойынша шілде айының соңына дейін 5 шақырым автокөлік жолына толық асфальт төселеді.
- Ауыл болғалы бірінші рет асфальт жол құрылысы басталды. Бұрын болмаған жаңалық. Әрине, қуаныштымыз. Жолымыз сапалы салынып, елдің игілігіне айналсын. Аудан әкімі Ділдәбек Оразбаевқа айтар алғысымыз шексіз. Ауыл халқымен кездесуге келгенде айтқан өтінішімізді жерге қалдырмады. Шын айтсақ, өзіміз де басында сенген жоқпыз. Енді міне жұмыстың басталғанын көзімізбен көріп тұрмыз, - дейді Толағай ауылының байырғы тұрғыны Нұржан Сарманов.
Жоба «Паритет 50-50» мемлекеттік бағдарламасының аясында жүзеге асырылуда. Жол құрылысын жүргізуші мердігер ұйым «Көкпекті жолдары» ЖШС. Көкпекті мен Толағай ауылдарының арақашықтығы 18 шақырым. Биылғы жылы Абай облысының әкімі Нұрлан Ұранхаевтың қолдауымен аталған жолдың 5 шақырымына орташа жөндеу жұмыстарын жүргізуге қаражат бөлінді. Аталған жолдың қалған бөлігіне орташа жөндеу жұмыстарын жүргізу мақсатында «Толағай ауылына кіреберіс» 13-18 шақырымға жобалық-сметалық құжаттар әзірленді. Алдағы уақытта бұл жоба қолдау тауып, қаржы бөлінген жағдайда, жолдың қалған бөлігіне орташа жөндеу жұмыстары жүргізілетін болады.
- Жұмыс жоспарға сай атқарылуда. 10 шілде күні басталған 5 шақырым жолдың бүгінгі күні 2.8 шақырым толық аяқталды. Шілде айының соңына дейін асфальт төсеу жұмыстарын бітіреміз. Жоба құны 238 миллион теңге. Нысанға 1 асфальт төсеуші машина, 2 каток және 6 КАМАЗ техникасы жұмылдырылды. 8 адам жұмыс жасауда. Жұмысты сапалы әрі уақытында бітіруді мақсат етіп отырмыз, - деді мердігер ұйым басшысы Гүлназ Құдайбергенқызы.
Айта кетейік, биылғы жылы Көкпекті, Үлкенбөкен, Преображенка ауылдарында ауылдың ішкі жолдарына орташа жөндеу жұмыстарын жасау жоспарланған. Қаражат бөлінді, конкурстық шаралар өткізілуде. Жақын уақытта жұмыс басталады. Аудан әкімі Ділдәбек Оразбаев ендігі кезекте Көкжайық-Үлгілімалшы, Көкпекті-Биғаш автокөлік жолдарына асфальт төсеу үшін қаражат бөлу бойынша жұмыс жүргізіліп жатқанын мәлімдеді.
- Бүгінгі күні Көкжайық-Үлгілімалшы ауылдары арасындағы жолға орташа жөңдеу жүргізу үшін жобалық-сметалық құжаттар дайын, облыстық басқармаға ұсынылды. Сонымен бірге Көкпекті-Биғаш ауылдары арасындағы жолға орташа жөңдеу жүргізіп, асфальт төсеу үшін жобалық-сметалық құжаттар әзірленуде. Жақын арада құжаттар толық дайындалып, тиісті басқармаға ұсынылатын болады, - деді аудан әкімі Ділдәбек Тәжібайұлы.
Ауыл тұрғындарының айтуы бойынша Толағай ауылының автокөлік жолына асфальт салу неше жылдан бері айтылып, көтеріліп келе жатқан өзекті мәселе. Биыл міне ауыл тарихында алғаш рет асфальт жол салына бастады. Аталмыш трасса қазіргі халықаралық стандарттарға сәйкес салынатын болады.
Бұл жолдың құрылысы аудандағы көлік қатынасының сапасы мен қарқынына игі әсерін тигізері айдан анық.

Пікір: