Қаңтар айы қадам басқалы Көкпекті ауданы қалың қармен арпалысып әуре-сарсаңға түсіп жатқаны барлығымызға аян. Қалың қардың салдарынан көше жолдары жабылып, көлік қатынауы қиынға соққанын да көзіміз көрді.Табиғаттың бізге тартқан «тосын сыйына» тосқауыл бола алмасақ та, қар тазалау жұмыстары тез әрі тиянақты жүргізіліп жатыр деуімізге толық негіз бар. Оған дәлел «Көкпекті жолдары» ЖШС, «Вайнах» ЖК,  Көкпекті аудандық «Коммуналды шаруа-шылық» жұмысшыларының күн-түн демей жасап жатқан қыруар жұмыстары. «Бүгінде Көкпекті ауылы бойынша ауыл сыртына 11 500 шаршы метр қар шығару орыны дайындалды. Қар белгіленген жерге тасымалдануда. Бүгінгі күнге дейін 6640 куб көлемінде қар шығарылды.

Жұмыс әлі де жалғасын табады» - деп хабарлайды Көкпекті ауылдық округінің әкімі Қайрат Алғазинов. ЖШС Көкпекті жолдарында ерікті еңбек етіп жүрген белсенді жұмысшылардың бірі Ербол Тоқтарбаев. Ол кісінің айтуынша ер азамат болған соң елге пайдаңды тигізу азаматтық парыз. Сондай-ақ ауыл көшелері жиегіндегі қарларды тазалап, жолды кеңейтіп жүрген жұмысшы-механизаторлар Сұлтан Ибрагимов мен Аслан Жұмажанов. Сондай-ақ, жаяу жүргіншілер жолын қардан тазалап қарапайым халықтың жүріп-тұруына ыңғай жасап жүрген әкімшілік жұмысшыларына да ерекше ықылас білдіреміз.   Біздер үйде жылы көрпеге оранып жатқанда осындай еңбекқор азаматтар қарлы боранға қарамастан ел игілігі үшін жұмыс жасауда. Осы орайда «Көкпекті жолдары» ЖШС шаруашылығының директоры Гүлназ Нұрғалиеваға, орынбасары Олег Вишнековқа, «Вайнах» ЖК және қар тазалау жұмыстарында белсенділік танытып жүрген барша жұмысшылар ұжымына аудан жұртшылығы атынан зор алғыс білдіреміз. Халықтың алғысына бөленіп, елдің ақ батасын алып жүрген аудан орталығының әкімі Қайрат Алғазиновтың ерен еңбегін атап өткен жөн. 

Айдын ТОҚСАНОВ

Пікір: