Өткен дүйсенбіде аудан әкімі Рамиль Сағындықов Көкпекті ауылында азаматтарды жеке мәселесі бойынша қабылдады.
Қабылдауға келгендердің аудан әкіміне айтқан арыз-армандарының басым бөлігі баспана мәселесі болды.

Тұрғын үймен қамтамасыз ету мәселесі аудан көлемінде көкейкесті болып келе жатқанына бірнеше жылдың жүзі болғанын айта кету керек. Үй кезегінде тұрғандардың саны жыл сайын артпаса кемімей отыр. Көкпекті ауылының тұрғыны Г.Шәкенова 36 пәтерлік үйде тұрады. Жалпы бұл үй қызметтік пәтерлер қатарында. Ал оған пәтер анасынан мұраға қалған, сондықтан да ол осы пәтерді өзіне жекеменшікке жаздыруды қалайды. Қазіргі күні ТҮКШ-тің мәліметі бойынша бұл мәселе комиссияда қаралған, комиссия пәтерге байланысты қосымша материалдар жиналғанша шешім шығаруды шегере тұруды жөн санаған.
Ауданда азаматтардың жұмыссыздығы да өткір мәселе. Тұрғындардың жоғары білімді, дипломы бар дәрежесіндегіден арнайы орта білімділеріне де, тұрмыс деңгейі төмен отбасыларына да жұмыс табу қиын. Сондықтан аудан әкімі жұмыспен қамту және әлеуметтік бағдарламалар бөліміне әрбір жұмыссыз азаматтың мәселесін жеке бақылауда ұстап, арыздарын жеке қарауды тапсырды.
Қабылдау кезінде кейбір мәселелерге қа-тысты заңнамаларды түсіндіруге де аз уақыт кетпейді. Бұл кейбір дербес бөлімдердің және ауылдық округ әкімдерінің азаматтардың арыздарымен жұмыс істегенде қызмет көрсету сапасының нашар екенендігі көрсетті. Мысалы, Преображенка ауылының тұрғыны М.Мизамитов жер телімін алу жөніндегі кеңесті жергілікті әкімшіліктен алса да болар еді, алайда оған неліктен нақты жауап қайтарылмағаны белгісіз.
Өкінішке қарай, көп жағдайда мәселе азаматтардың өздерінің құқықтарының қандай заңдармен қорғалатынын білмеуінен туындап жатады. Сондықтан да, азаматтардың заңды оқып-үйрену мәселесіне көбірек көңіл бөлетін кез жетті.
Барлық мәселелер бойынша аудан әкімі тұрғындарға түсінік беріп, олардың сауалдары бойынша туындаған тапсырмаларды орындау және жүзеге асырылуын дербес бөлімдерге тиісінше тапсырды.
Екатерина СКУДАРНОВА

Пікір: