Бүгінде бес халықтық реформаны тайға таңба басқандай белгілеп, іске асыра бастаған қазақстандықтардың тәжірибесіне терең үңіле бастаған өзге елдер аз емес. Ең бір артықшылығы өз атауынан көрініп тұрғанындай, оның халық үшін жасалғаны. Осы реформаның төртіншісінде мемлекет құраушы ұлт ретінде қазақ халқына айрықша жауапкершілік жүктелетіні атап көрсетілген. Өйткені, қазақтар жаңа Қазақстанның болмысын қалыптастыруда барлық ұлыстарды ұйыстырушы рөлге ие. Мұндай міндет Қазақстандағы өзге этнос өкілдерінің мемлекет құраушы ұлтқа деген шексіз құрметі мен алғыс сезімі одан әрі арта түскен жағдайда ғана ойдағыдай іске аспақ.  Халқымыздың ерлік пен елдікке толы жылнамасында  қайғылы да қасіретті кезеңдердің де аз болмағаны ащы шындық.  Тәуелсіздік жылдарында ел шежіресінің ақтаңдақ беттері ашылып, мемлекет тарихы жаңа мазмұнда, жаңа көзқараста жазылып келеді. Тарихшылардың мәліметінше ашаршылық жылдарында елі-мізде 1,5 миллионға жуық адам көз жұмған. 

Ашаршылықтың ізін ала репрессия келді.  Репрессияға тек қазақ халқы қана ұшыраған жоқ. Қанды жылдарда қазақ жеріне тұтас халықтар жер аударылды. ХХ ғасырдың бірінші жартысында Қазақстанға миллиондаған адам күшпен көшіріліп әкелінді. Олардың қатарында корейлер, финдер, немістер, поляктар, күрдтер мен қарашайлар, месхеттік түріктер, кавказдықтар және басқа да көптеген ұлыстар бар. Үздіксіз жалғасқан саяси науқандар мен қанды қасаптардан есін жия алмай жатқанына қарамастан, қазақ халқы, тағдырдың тәлкегіне түскен барша ұлыстарды бауырына басты. Қазақ жеріне қоныс аударған сол этностар өкілдерінің барлығы бүгінде біздің бауырларымызға, отандастарымызға айналды. Тар жерде табысқандардың ұрпағы– кең жерде келісіп, бүгін тағдыры бір Қазақстан халқы деген ұлы елге айналды. Бейбітшіліктің бесігі атанып, бүкіл әлемге танылды. Төрт тарапты түгел мойындатып, өсіп-өркендеу жолына түсті. Сол біртұтас елдің қатарында біздің ауданның да көпұлтты тұрғындары бар. Олардың барлығы да бір кісідей жұмыла еңбек етіп, Мәңгілік ел құру жолында еңбек етуде.

Құрметті аудан тұрғындары, отандастар! Сіздерді еліміздегі татулық пен бірлікті паш ететін тағы бір мереке – Алғыс айту күнімен шын жүректен құттықтаймыз! Бірлігіміз нығайып, берекеміз арта берсін!

Р.Сағандықов,аудан әкімі

Р.Беспаев, аудандық мәслихаттың хатшысы

Пікір: