Тассай ауылында барлық сала мамандары және еріктілердің қатысуымен «Біз біргеміз» акциясы жалғасын табуда. М.Әуезов атындағы орта мектебінің жас ұстаздары Нұргүл Изгуттинова, Салтанат Далбина, Эльмира Изгуттинова, Бахыт Мазыбаева, Лаура Абикенова ауыл тұрғындарының өмірі мен денсаулығының қауіпсіздігін қамтамасыз ету мақсатында 250 дана бетперде тігіп, ауылдағы қарт адамдарға, көпбалалы, жағдайы төмен отбасыларға тегін таратты. Ауылымыздың белсенді жастары да 70 дана бетпердені әр түрлі санаттағы тұрғындарға тегін таратып алғыстарын алды.

Осы ауылдық округке қарасты Үшкөмей ауылының жас келіндері де бетперде тігіп, өз жерлестеріне тегін таратуда. Акцияның мақсаты әр ауыл тұрғынын бетпердемен қамтамасыз ету. Қазіргі уақытта ауыл тұрғындары Айгүл Арыстанбекова сатылымға шығарған бетперделерінің бағасы 200 теңгені, зейнеткер апамыз Айман Жексенбаеваның қолынан шыққан маскалардың бағасы 100 теңгені құрайды.
Сонымен қатар, зейнеткер тігінші Русал Құдагелдинова апамыз да акцияны қолдап, бетперделер тігіп туған-туыстарын мен көрші-қолаңдарына тегін таратты.
Жақсылық жасау тек жекелеген еріктілердің ғана емес, сіз бен біздің де қолымыздан келетін дүние, - дейді Айман апамыз. Бүгінгі күнде тассайлықтар береке-бірлігінің арқасында бетперде тапшылығының шешімін тапқаны - баршаға үлгі!

Ауылдық округ ақпараты

Пікір: