9 мамыр күні Үлкенбөкен ауылында Ұлы Отан Соғысы Жеңісінің 73 жылдығына арналған мерекелік шара өтті. Округ мекемелерінің ұжымдары Ұлы Отан соғысы жауынгерлерінің ескерткіштеріне гүл шоқтарын қойды.
Ұлы мерекенің мәнін терең түсініп, соғыстан қайтпай қалған ерлерді бір минуттық үнсіздікпен еске алып, арамызда жүрген жалғыз соғыс ардагері Семен Михаилович Винников және тыл еңбеккерлеріне мектеп оқушылары гүлдерін ұсынды. Үлкенбөкен ауылдық округі әкімі аппаратының атынан бас маман К.Байтасова мерекеге келген ардагерлерді, қонақтарды құттықтап, салтанатты түрде Николай Иванович Керенцевқа әкесі Иван Гаврилович Керенцевтің қайтыс болғаннан кейін, ерлік істері үшін «Кеңес Одағының батыры» атағы беріліп, куәлігі (Ресей Федерациясының президенті В.Путин қол қойған) тапсырылды. Үлкенбөкен ауылындағы ерекше режимдегі мектеп-интернат директорының орынбасары М.Сейтказин, орман шаруашылығының басшысы Р.Жакупов, дәрігерлік амбулаторияның жалпы тәжірбиелі дәрігері З.Атиманова ардагерлерді Жеңіс күнімен құттықтап, ізгі тілектерін арнады.

Мектеп оқушыларының әдеби – музыкалық сәлемі жиылған қауымның көз алдына отты жылдарды елестетіп, көздеріне жас ұялатты. Үлкенбөкен ауылының «алтын дауысы» Дулат Манарбекұлы «Журавли» әнін орындап, көрермендердің көңілінен шықты. Ерекше режимдегі арнайы мектеп-интернат ұжымының атынан М.Алдабергенова, М.Атиев ән салып, мектеп ұжымының жас мұғалімдері би билеп өз өнерлерін көрсетті. Мереке соңында соғыс ардагерлері және тыл еңбеккерлері әкімшілік ғимаратына дастарханға шақырылды.

Айжан Сүлейменова,
Үлкенбөкен ауылдық округінің жетекші маманы

Пікір: