8 ақпан күні Жақия Шайжүнісов атындағы орта мектебінде "Әкем - алтын діңгегім" атты әкелер форумы өтті. Мектеп ұжымының ұйымдастырумен өткен атаулы шараға оқушылардың әкелері арнайы шақырылды. Бұл форум арнайы бағдарлама бойынша түрлі іс-шаралармен бірге өтті.

Іс-шара мақсаты – әке мен бала арасындағы байланысты нығайту, мектеп өміріне деген жақсы көзқарастарын қалыптастыру. Тәрбиелік мәні зор болған шарада отбасындағы әкенің рөлі, тәрбиесі кеңінен сөз болды. Әкелерді мектептің дәлізінен қарсы алып, әкелермен асық ату, шашки ойнау, шардағы арнайы дайындалған сұрақтарға жауап беру сынды түрлі ойындар ойнатылды.

Шараға аудан әкімінің орынбасары Мақсат Сүйесінов, округ әкімі Қайрат Алғазинов, ішкі саясат бөлімінің басшысы Азат Рахимбаев, аудандық білім бөлімінің басшысы Аслан Танысбаев қонақ болып қатысты.
Форум мектептің мұражайы мен білім ордасының оқу кабинеттерін таныстырумен жалғасын тапты. Сонымен қатар, АКТ залында әкелер үшін арнайы дайындалған концерттік бағдарлама мен тәрбиелік мазмұны бар баяндамалар оқылды. Мектеп директоры Бексаинова М.К мектептің тыныс-тіршілігін айтып, сөз сөйледі. Әкелерге арналған бейнероликтер қосылып, балаларының әкелеріне арнап жазған шығармалары мен видео-жолдаулары да көрерменге жол тартты.
Форум соңында әкелер алған әсерлерімен бөлісіп, ой-пікірлерін айтып, алғыстарын білдірді. Мектепте тағылымы мол шаралар әлі де жалғасын таппақ. Жалпы форумға 100-ге жуық әке қатысты. Шараға келген әкелер қауымына мектеп ұжымының айтар алғысы шексіз.

Пікір: