Палатцы округіне қарасты Подгорное ауылында мектеп жанынан жылыжай салынды. Жұмыс сапарымен ауылдарды аралаған аудан әкімі Асхат Смаилов мектеп жанынан салынған нысанға жауапты мердігермен кездесіп, жылыжай құрылысымен танысты. Шалғай ауылдағы көкөніс тапшылығы – аудан әкімінің тұрғындар алдындағы есеп беру кездесуінде көтерілген мәселе. Мектеп жанынан бой көтерген жылыжайда көкөніс өсіріліп, мектеп асханасына және тұрғындар сұранысын орындауға пайдалану жоспарланып отыр. Дәл осындай жылыжай құрылысы Шұбарқайың ауылында да жүріп жатыр. Асхат Сайдахметұлы ауылдық округ әкімі Бағжамал Базылағзамқызы мен білім беру бөлімінің басшысы Шолпан Мустафиноваға жаңа оқу жылының басында жылыжайды іске қосуды міндеттеді.

- Жылыжай салып, одан өнім жинаудың білім ордалары үшін маңызы зор. Біріншіден, мектеп асханасының ас мәзірі адам денсаулығына пайдалы дәрумені мол көкөніспен толығады, екіншіден, оқушылардың көкөніс өсіру дағдысы қалыптасып, еңбек етуге үйренеді. Сондай-ақ, мұғалімдерге де сабақты тәжірибемен ұштастырып өткізуге мүмкіндік туатыны белгілі. Сондықтан, мектеп жанындағы жылыжай жобасы дұрыс жолға қойылса, жақсы нәтиже берері сөзсіз. Болашақта барлық білім беру мекемелерінің жанынан жылыжай жұмыс істеп тұруына қол жеткізуіміз керек, - деді Асхат Сайдахметұлы.
Мектеп ауласындағы абаттандыру жұмыс-тарымен танысқан аудан басшысы бірқатар тапсырмалардың орындалмай тұрғанын ескертті. Естелік мемориал мен мектепті жалғайтын алаңға брусчатка төсеу, абаттандыру барысы көңіл көншітпейді. Білім беру бөлімінің басшысы мен мектеп директорының жұмысы сынға ілінді. Бөлінген қаражатты тиімді игеріп, жұмысты сапалы әрі уақытылы орындау жүктелді.
Палатцы ауылындағы әкімшілік ғимаратының бір бөлігі мәдениет ошағына айналады. Ұзақ уақыт бойы қаңырап бос тұрған үлкен зал қайта жөндеуден өткізіліп, тұрғындар игілігіне берілмек. Жөндеу жұмыстарына дайындық барысы туралы ақпарат берген мәдениет және тілдерді дамыту бөлімінің басшысы Айнұр Отаршина жобалау-сметалық құжаттар әзірленіп жатқанын жеткізді.
Самар ауылының орталық алаңында субұрқақ құрылысын жүргізіп жатқан мердігер ұйым өкілдерімен кездесу өткізілді. Құрылысшылар бригадирі бүгінгі күнге дейін атқарылған жұмыс-тарды баяндап, жобаны уақытында аяқтаймыз деп сендірді. Асхат Сайдахметұлы ауылдық округ әкімінің орынбасары Гүлнар Мажибаеваға орталық алаң құрылысы барысында жаңадан тұрғызылатын қоршаудың жобасын дайындауды тапсырды.
Көкжыра ауылына кіреберіс жолда ағымдық жөндеу жұмыстары жүргізіліп жатыр. «№ 14 - жол - құрылыс басқармасы» ЖШС өкілі Александр Калинин 3 шақырымдық жолдың жөндеу жұмыстарын бір аптаның ішінде аяқтаймыз дейді. Күннің ыстығына қарамастан қауырт жұмыс жүргізіп жатқан жолшылардың жұмысты сапалы орындайтынына сенім мол.
Аудан басшысы ауыл ортасынан бой көтерген шағын футбол алаңына арнайы ат басын бұрды. Ризабек Қасенхан бастаған жігіттер жұмыс барысын баян етті. Жоба бойынша жасыл алаңның жанынан заманауи құрылғылармен қамтылған «Street workout» тұрғызылады. Асхат Сайдахметұлы футбол алаңының жасыл төсенішін жаю барысында жіберілген кейбір кемшіліктерді жою қажеттігін ескертті. Көкжыра ауылының тұрғындары асыға күткен спорт алаңын салу жұмыстары сапалы болуына округ әкімшілігі бақылауды күшейтуге міндетті.
- Біздің барлық іс-қимылымыз ауыл тұрғындарының сұранысын қанағаттандыруға бағытталуы керек. Бүгін қолға алып жатқан жобалардың барлығы еліміздің болашағы - өскелең ұрпақ үшін жасалып жатқан игіліктер, - деп түйіндеді аудан басшысы.

Пікір: