Қазақстан Республикасының 26 жылдығына орай Ж.Болғанбаев атындағы орта мектеп-лицейде Желтоқсан оқиғасының 31 жыл толуына арналған патриоттық бағыттағы ашық сабақ өтті. Бұл іс-шараға Көкпекті ауданы ардагерлер кеңесі төрағасының орынбасары Н.Шалова, Самар селолық округі ардагерлер кеңесінің төрағасы А.Садықов, әйелдер кеңесінің төрайымы Э.Степанова, Ауған соғысы ардагері Ақылбек Исағұлов, Чернобыл апатын жоюға қатысқан Қайрат Қаймұлдинов және Самар агро-техникалық колледждің студенттері қатысты.

Өткізіліп отырған іс-шараның басты мақсаты оқушылар мен жастарға 1986 жылғы Желтоқсан оқиғасының болу себептерін және тәуелсіздіктің қадір-қасиетін түсінуге тәрбиелеу. Отан-Ананы құрметтеп, тәуелсіздікті бағалай білуге, ұлтжанды, елжанды болуға, елінің тәуелсіздігі жолында күрескен ерлердің қаһармандығы мен күрескерлік ерліктерін әрдайым есте ұстап, үлгі ету. Елін, жерін, тілін құрметтейтін, өз отанын сүйетін азамат қалыптастыру, от жүректі өжет мінезді ұл-қыздардың ерлік істеріне мәңгі құрмет көрсетуге бау лып патриоттық сезім қалыптастыру.
10 сынып оқушылары мен алғашқы әскери дайындық пәнінің мұғалімі Асылбек Асаубаев дайындаған патриоттық тақырыптағы көріністер, Қайрат Рысқұлбековтың қайсарлығы мен ерлігі желтоқсан оқиғасына қатысқан жастардың өмірі мен басынан өткен қиындықтары туралы қойылымдар көрсетілді. Желтоқсан оқиғасына қатысушылар туралы слайдтар көрсетіліп, өмірбаяндары оқылды.
Сөз кезегін алған селолық ардагерлер кеңесінің төрағасы А.Садықов Желтоқсан оқиғасы өзінің қайсарлығымен, алға қойған мақсат-мұратымен, тіпті жіберілген кемшіліктерімен де әрбір адамның есінде мәңгі сақталатынын айтты. - 1986 жылғы желтоқсан оқиғасы қазақтың басын біріктіріп, бір жұдырыққа жұмылдырған бақытты да, қайғылы күн еді. Желтоқсан жаңғырығы көзден де көңілден де кетер емес. Бүкіл бір ұлттың сүйегіне таңба түсіріп, әділетсіз шешім қабылданып, халықтың ар-намысы таразыға салынған сын сағатта дүлей күшке қаймықпай қарсы шыққан жастардың ерен еңбегі ұрпақтан-ұрпаққа үлгі, - деді.
Осы айтылған пікірге қосылған Самар селолық округі имамы Б.Калебай, Самар агро-техникалық колледжі тәрбие ісі жөніндегі орынбасары Ш.Қырманбаева, Қайрат Қаймолдинов желтоқсан оқиғасының тарихи маңызы туралы айтып берді және жастарды өз елінің патриоттары болуға шақырды.
Іс-шараның соңында Самар селолық округінің ақсақалдар кеңесінің төрағасы А.Садықов оқушыларды және әскери дайындық пәнінің мұғалімі Асылбек Асаубаевты осындай іс-шараны ұйымдастырғаны үшін алғыс хаттармен марапаттады.

Сауых Ерназар, 
жастар саясаты жөніндегі жетекші маман

Пікір: