Ақсуат пен Көкпекті, Ақжар мен Самар ежелден ауылы аралас, қойы қоралас ағайын ел. Самар ауылының даңқы - балдай сырасы мен ауыз толтырар ақбөлкесімен шыққанда, Көкпектіліктерде егінімен, шөбімен, ешкісімен мақтанатын. Ақжарлықтар «Ақжардан Мәскеуге» театрларымен жол салғанда, Ақсуаттың Бағаналы Саятүлеков атындағы ұлт аспаптар оркестрі малшы ауылдың төріндегі радиоқабылдағыш арқылы Алматыдан күй төгетін. «Елеке сазы», «Тоғыз тарау», «Қалба», «Байбура» жайлауларында спектакль қойылып, ән салынатын. Сондағы әртістер Алматы мен Семейдің кәсіби қызметкерлерінен кем түспейтін. Бүгін сол алтын көпір қайта тартылғандай, аталар дәстүрімен ауданымызға Ақсуат мәдениет үйінің "Ақсуат халық театры" келді.

Алғыс айту күні – Қазақстан халқын мәңгілікке біріктіруге бағытталған «Мәңгілік Ел» жалпыұлттық патриоттық идеясының, қазақстандық бірегейліктің негізгі арқауы - еліміздегі барлық ұлт пен ұлысты бір шаңырақ астына топтастыратын Қазақстан халқы Ассамблеясының күні. Биыл екінші мәрте тойланып отырған бұл атаулы күн еліміздегі ең жарқын мерекелердің қатарында. Бүкіл қазақстандықтармен бірге біздің ауданның ауыл-аймақтарында айтулы күн жан-жақты аталып өтті.
Көкпекті ауылындағы тарихи-өлкетану мұражайы және Балалар өнер мектебі ұжымының ұйымдастыруымен 1 наурыз Алғыс айту күніне орай мерекелік шара өтті. Шараның мақсаты - көпұлтты Қазақстан қалыптасқан тарихи оқиғаларды еске алу, жастардың аға буынының құндылықтарын дәріптеу, толеранттылыққа, ортақ тіл табыса білуге, туған жерін құрметтеуге және Отанын сүюге үйрету болды.

«Біздің халық ән құмар халық. Біреу қолына домбыра алып, ән сала бастаса, ойдағы – қырдағысы жиналып, сегіздегі бала, сексендегі шалына дейін қалмай қаумалап,айтшы – айтшылап жанын жағасына келтіреді.
Бара – бара не болса да сол әндегі рух сүйегіне сіңеді, құлағында қалады.»
С.Торайғыров

М.Әуезов атындағы орта мектебінің салтанат залында ауылдастар арасындағы өнерпаз қауыммен мектеп оқушыларының кездесуі ұйымдастырылды. Музыкалы шарада ауылдағы мәдениет ошағының өткен тарихы экраннан көрсетіліп жатты. 1960 жылы іргетасы қаланған ауыл клубының елге деген қызметі сонау тоқырау жылдарының дүрбелеңі кезінде де бір сәт тоқырамай ауылдағы өркениет пен мәдениеттің түп қазығы болып, бүгінгі күнге дейін халықпен бірге жасап келеді.
Іс-шараның шымылдығын әнші қызымыз Жібек домбырашылар ансамблінің сүйемелдеуінде «Гүлдерайым» әнімен ашты.Бұл кездесу жасөспірімдерге рухани тәрбие беру мен ұлттық өнерге деген сүйіспеншіліктерін арттыру мақсатын көздеді. Кездесуге дәстүрлі әнші Катрен Байжұманов, халық әндерін нақышына келтіре орындайтын әуесқой әнші Мақсұтхан Рақымбек, ән айтудың қыр-сырын жетік меңгерген Мейрамгүл Мауытханқызы, әнші Шынар Мұқанова мен бірнеше ұлттың тілінде шырқап көрермен көзайымына айналған Гүлнар Камзина, кәсіби музыкант, дирижер Айман Бапабаева, музыка пәнінің мұғалімі ұлттық музыка мен әндерді насихаттаушы, домбырашы Гүлнар Алкеевалар құрметтеп шақырылды. Елге қуаныш пен шат көңіл сыйлаған ауыл сахнасы саңылақтарының жас ұрпаққа айтары болды.

16 ақпанда Толағай ауылында Кеңес әскерлерінің Ауғанстан жерінен шығарылғанына және интернационалист-жауынгер Марат Бейсембаевты еске алуға арналған Көкпекті ауданының негізгі мектептері арасында шаңғы жарысы өтті.
Қараөткел, Палатцы, Шәріптоғай, Романов, В.Маяковский атындағы мектептің оқушылары және жарысты ұйым-дастырушы мектеп өздерінің спорттық дайындықтарын көрсетті. Ауған соғысының ардагерлері Ерлан Жұмажанұлы Жұмажанов пен Ахат Әділбекұлы Терлікпаев, дене шынықтыру және спорт бөлімінің бас маманы Сәбит Темірханов, аудандық білім бөлімінің әдіскері Талғат Қасаинов спорттық шараның құрметті қонақтары болды. Шаңғы жарысы басталмас бұрын акт залында Кеңес әскерлерінің Ауғанстан жерінен шығарылғанына 30 жылдығына арналған іс-шара өтті. Шара мектеп директоры Гүлфия Тоқтасынованың кіріспе сөзінен басталды. Оқушылардың орындауында соғыс жылдарындағы патриоттық өлеңдер мен әндер көрермендерді бей-жай қалдырмады. Осы салтанатты жағдайда ардагерлерге құрмет көрсетіліп, Ауған соғысында қаза тапқан сарбаздарды еске алды.