Ауданымызда цифрлық теңсіздікті жою мақсатында жұмыстар жоспарға сай жүргізілмек. Яғни,сапалы байланысты қамтамасыз ету мақсатында жоғары жылдамдықты интернет желісін тарту жұмыстары жақын күндері бастау алмақ.

Сәуір айында аудан әкімі Әділет Нұрсағатұлы “Қазақтелеком” АҚ Шығыс Қазақстан облыстық телекоммуникациялар дирекциясының өкілдерімен кездесу өткізіп, аудан аумағындағы интернет жылдамдығын арттыру мәселесін талқылады. Кездесу нәтижесінде Көкпекті ауылында 2025 жылдың соңына дейін «GPON» технологиясы негізінде талшықты-оптикалық байланыс желісі тартылатыны белгілі болған еді.

Толығырақ айтар болсақ, ауданымызда бүгінгі күні интернет жылдамдығы шамамен 8 Мбит/секунд болса, талшықты-оптикалық байланыс желісі іске қосылғаннан кейін бұл көрсеткіш 150 Мбит/секундқа дейін артады.
10 маусым күні аудан басшысы Әділет Қожанбаев жобаны жүзеге асыратын мердігер ұйымның өкілі Салим мырзаны және аудандық “Қазақтелеком” бөлімінің меңгерушісі Мәди Көшербайұлын қабылдап, алдағы жұмыстардың нақты жоспарын талқылады. Жақын күндері мердігер мекеме Көкпекті ауылындағы әрбір үй мен мекемеге жоғары жылдамдықты интернет желісін тарту жұмыстарын бастайды.
Айта кету керек, бұл - Абай облысында алғаш жүзеге асырылып отырған бірегей жоба. Өзге аудандарда мұндай жоғары технология әзірге енгізіле қойған жоқ.
Бұл жаңашыл бастама өзін-өзі дамыту мен заманауи технологияларды қолдануда ауылдағы бала мен қаладағы баланың мүмкіндіктері тең дәрежеде қол жеткізуге негіз болмақ. Көкпектілік жұртшылық үшін үлкен мүмкіндіктерге жол ашып, цифрлық даму деңгейін жаңа сатыға көтереді деп сенеміз.

Пікір: