Адамзат қоғамы қаншама ілгерілеп даму үстінде болса да, азаматтар арасында әлі де жұқпалы дерттей таралып, әлсіз топтардың арасында жат әрекеттердің орын алып отыратындығы рас. Сондай келеңсіз әрекет дейміз бе, әлде әдет десек пе, әйтеуір кейбір жасөспірімдер мен жұмыссыз бос жүрген ересектер қарасораны шегуге құмартатыны кездесіп қалатын жайт.  Ауданымызда Көкпекті ауылдық округі әкімшілігінің тапсырмасымен адамның ақыл-есін тұмандандыратын жабайы өсетін қарасораны құрту бойынша іс-шаралар қолға алынып, рейд жүргізілді.

Бұған дәлел ретінде 17 шілде күні Көкпекті аудандық ішкі істер бөлімі бастығының орынбасары, полиция майоры Қ.Алғазинов, полиция майоры Б.Адылханов, Көкпекті ауылдық округі әкімшілігінің өкілі Е.Әубәкіров, криминалдық полиция бөлімінің қызметкері О.Ахметжанов және учаскелік инспектор М.Қасеновтың қатысуымен Көкпекті ауылының Заречный бөлігіндегі «Балерке» балабақшасының жанындағы орман саябағында қалың өскен жабайы қарасораның көзін жою жұмыстары жүргізілгенін айтуға болады. Полиция майоры Б.Адылханов: «Бұл өсімдіктің адамдарға, олардың денсаулықтарына келтіретін зияны шаш етектен. Аталмыш өсімдікті (анашаның туысқаны) шеккен адам өз әрекеттеріне жауап бере алмайтын жағдайда болатындықтан, біздің бұл ісіміз жасөспірімдер мен басқа да азаматтарды заңға қайшы келетін әрекеттерден сақтандыру жағынан да маңызды. Барлық ауыл тұрғындарын қарасораның (кендір) өсіп тұрған жерін кездестірсе, оны құртуға атсалысуға шақырамыз. Бүгінгідей енді ұрық шашатын кезеңде құртып, өртеп отырса, бара-бара жойып жіберуге болады», - деп өз пікірімен бөлісті.

Бұл игі іс - болашақтың қамы екені белгілі. Тәртіп сақшыларының бұл бастамасы көпшілік арасынан кең қолдауға ие болатынына сеніміміз мол.

Бақыт МҮЛІКОВА

Пікір: