Қазақ халқының тәрбие жүйесінде жас ұрпақты, қоғам мүшелерін Отанға, халқына, елге, жерге деген сүйіспеншілікке тәрбиелеп, мұны олардың бойына сіңіріп, қалыптастыру жетекші орын алады. Өйткені, Отан, халық, ел, жер деген ұғым өте ауқымды. Бұған шын мәнінде адамның бүкіл болмысының қатысы бар. Өзінің бүкіл халық болып, мемлекет болып құрылу тарихында талай тар жол, тайғақ кешулерді, басынан кешіріп үнемі шапқыншылардың шабуылына төтеп берумен өмірін өткізген халқымыз елді, жерді қорғаудың қадірін ерте түсініп, баласын ана сүтімен бірге Отанын сүюге және қорғауға тәрбиелеген.

Әскери қызмет - әр азаматтың Отан алдындағы абыройлы борышы екені баршамызға белгілі. Соңғы жылдары әскер қатарына шақырылатын және азаматтық борыштарын өтейтін жастардың қатары сиреп барады. Оның себебі неде? Осы мәселе төңірегіндегі мән-жайдың түйінін тарқатпақ мақсатпен аудандық қорғаныс істері жөніндегі бөлім бастығының орынбасары Д.Нұрекеновке жолыққан едік.

-Қазіргі жастардың түсініктері әр қилы. Кейбіреулері өзгелердің «әскер қатарында болғаннан қандай пайда, бекерге уақыт өткізесің»» дегендей теріс пиғылдағы насихаттың жетегінде жүрсе, енді біреулерінің ата-аналары баласының әскерге баруына карсылық білдіріп жатады.

Бұрындары әскерге шақырылушы жастардың денсаулығы ғана проблемалық мәселе болып жататын. Енді, жаңа айтып өткенімдей, жастардың басым көпшілігінің Отан қорғау ісіне тартылысы өте төмен. Медициналық комиссия қорытындысына сай әскерге шақырылушылар көбіне анемия, қан қысымы, омыртқаның қисық өсуі, майтабан ауруларына байланысты әскер қатарына жарамай жатады, - деген орынбасар орын алып отырған нақты мәліметтерге тоқталды. Оның айтуынша, 2014 жылы аудан бойынша  194 азамат әскер қатарына шақырылды. Алайда, жүргізілген тексерістердің нәтижесінде олардың 17-сі ғана әскерге жарамды болып шықты. Құрлықтағы қарулы әскери институты, Әуе қорғаныс күштерінің әскери институты, ҚР ҚМ Радиоэлектроника және байланыс әскери-инженерлік институты, Кадеттік корпус, Республикалық «Жасулан» мектебінеоқуға түсуге ниет білдіргендердің жалпы саны 21 болса, 9 азамат аудандық іріктеуден өтті. Олардың ішінен облыстық медициналық комиссиядан тек 3 үміткер ғана жолдама алған. Сондай-ақ, жалпы білім беру мекемелерінде, колледж бен лицейлерде білім алып жүрген 31 азаматтың әскерге шақыртылуы кейінге шегерілді.

Келісімшарт арқылы әскери қызмет жасаушылар қатарына 35 сарбазды жіберу жоспарланған болса, азаматтар арасында тілек білдіргендер тек 12 адамды құрады. 

Сонымен қатар, Д.Нұрекенов бүгіндері туындап отырған кедергілер жайлы айтып өтті. - Әскери есепке кедергі болатын мәселенің бірі - біз мемлекеттік мекемелерге сол жерде қызмет жасайтындар арасында әскерге шақырылатын жастағы қызметкерлер санын көрсетіп, анықтама беру туралы қатынас қағаз жібереміз. Өкінішке орай, көптеген мекеме басшылары біздің бұл сұранысымызға тиісті жауаптарын дер кезінде жібермейді. Бұл да  әскери міндеттілерді есепке алу жұмысына кері ықпалын тигізеді.

Әскерге шақырылушы жастардың арасында әскери қызметке икемді жастар да жоқ емес. Отан алдындағы әскери борышын өтегеннен кейін келісімшарт арқылы әскери қызметке қалып қызмет жасап жатқан жастарымыз да бар. Оларға мемлекет тарапынан әртүрлі жеңілдіктер қарастырылған. Атап айтсам, келісімшарт бойынша қызмет жасаушылар алғашында 3 жылға келісімшарт жасасу арқылы қызметін жүргізеді. 8 жылдан артық қызмет жасаған әскери қызметшілерге білімдерін жетілдіруге  арналған жеңілдіктер бар. Әскери қызметшілерге еліміздің аумағында таңдаған мамандығына сай жоғары оқу орнында сырттай оқып білім алуы үшін төленетін ақының 50 пайызы  Үкімет тарапын төленеді. Ал олардың пәтер жалдап тұруына төленетін төлемді мемлекет төлейді.  Олардың балаларын бала-бақшаға алу тағы да басқа көптеген жеңілдіктер қарастырылған. Сондай-ақ, әскери қызметшілер 47 жасында зейнеткерлікке шығады, - деді бөлім бастығының орынбасары.

Ал, біз өз кезегімізде ел басына күн туғанда қолға қару алып, елін-жерін қорғайтын азаматтар  саны ауданымызда көбейіп, сарбаздар қатары толыға түссін деген ниет білдіреміз.

Жібек ЕРЛАНҚЫЗЫ

Пікір: