Елбасы қаулысымен кәсіби мереке ретінде бекітілген полиция қызметкерлерінің күні төл мереке иелеріне құрмет көрсету мақсатында елімізде жыл сайын 23 маусымда аталып өтеді. Күйбің тіршіліктің қиын-қыстау кезеңінде демеу болып, аудан тұрғындарының қасынан табылатын Көкпекті аудандық Ішкі істер бөлімінің қызметкерлері құқықтық тәртіп пен қоғамның қауіпсіздігі үшн тәулігіне 24 сағат қалтқысыз қызмет атқарып, ел аузында қалатын ерлік жасамаса да, аудан тұрғындарының арыз-өтініштерін қанағаттандырып, алғыстарына бөленіп жүрген жайы бар. Күнделікті атқаратын жұмыстарының қиындығына қарамастан, полицейлердің табандылығы, төзімділігі, қырағылығы, қарапайымдылығы, өз істеріне деген сүйіспеншілігі кімді де болса қайран қалдыратыны анық.

Кәсіби мереке күні аудандық Ішкі істер бөлімінің мәжіліс залында полиция қызметкерлері Ішкі істер органы зейнеткерлерімен кездесті. Бас қосуда бөлім басшысы Е.Сейілханов әріптестері мен ардагерлерді кәсіби мерекелерімен құттықтап, қызметтеріндегі қырағылығы мен табанды еңбектері үшін алғысын айтты. Ал, аудан әкімінің атынан полиция қызмекерлерін аудан әкімінің орынбасары К.Смаилова құттықтап, аудан әкімінің мақтау қағаздары мен алғыс хаттарын құқық қорғау органының белсенді қызметкерлеріне табыс-тап, құттықтау сөзін жеткізді.

Бұл күні Ішкі істер бөлімінің қызметкерлеріне алғыс хаттар мен мемлекеттік марапаттар табыстау дәстүрге айналған.  Аталған дәстүр жалғасын тауып, үздік полицейлер мен белсенді қызметкерлер әр түрлі сыйлықтарға ие болды. ІІБ ардагерлер кеңесінің төрағасы Қ.Жүнісов  республикалық ардагерлер кеңесінің атынан ҚР ІІМ мадақтау төс белгісін аудандық ІІБ ардагері П.Чуркинға табыстады. Сонымен қатар, АІІБ және облыстық, аудандық ІІБ ардагерлер кеңесі атынан ардагерлер мен бүгінгі күні полиция қызметінде жүрген азаматтар алғыс хаттар және бағалы сыйлықтармен марапатталды. Ал, М.Байжуминов, Ф.Аверко, Ф.Мавлютов, С.Кенемолдин, Н.Құсаинова, К.Бытымбаев, З.Қабанбаев, Е.Хамитов, Л.Матанова, М.Қасенов, А.Ахмеров, А.Байсақаловтар белсенді қызметтері үшін медальдарға ие болды.

Тәртіп сақшылары – полиция қызметкерлерінің еңбектеріне табыс, қызметтеріне сәттілік пен абырой тілейміз. Ауданымыздың өркендеуі жолында табысты қызмет ете  берулеріңізге тілектеспіз.

Халқымыздың амандығын сақтау мен Отанымыздың өркендеуіне қосып жатқан үлестеріңіз аз емес, еңбектеріңіз әрқашан жемісті де табысты болсын!

Жанерке АБЫЛХАН

Пікір: