«MEN QAZAQPYN» дәстүрлі әншілер, термешілер мен күйшілердің телевизиялық Мега жобасының іріктеу кезеңінің концерті Көкпекті аудандық мәдениет үйінде өтті.
Өз өнерлерін сынатуға көкпектілік Бұлбұл Өмірсерік, Томан Рәпилә, Әли Жанғасинов, Фархат Маратұлы, Манарбек Бекішов, тассайлық Біржан Байжұманов, биғаштық Айжан Дүнгененова, преображенкалық Айдын Хұмырбек, құлынжондық Ниязбек Жанабаев қатысты. Өнерлі жастардың орындаушылық қабілеттерін, сахнада өзін-өзі ұстай біліп, көрерменді баурай алуларын бағалау Шығыс Қазақстан Облыстық «Алтай» телевидениесінің директоры Айда Жабағиева бастаған, құрамында Әлібек Саржанов, Дархан Бердібек, Асқар Сүлейменов бар қазылар алқасына жүктелді.

Дәстүрлі ән байқауына қатысқан Біржан мен Бұлбұл күйшілер Рәпилә мен Айжан уақыт пен дайындықтың аздығынан өз өнерлері мен таланттарын толық көрсетпей, ірке соқты. Құлынжондық Ниязбекті тосқан алқа мүшелері, одан көңіл көншітерлік орындаушылық көре алмады.
Термешілер арасынан Марат, Айдын, Фархат облыстық сайысқа жолдама алды. Осы іріктеу сайысының барлық шартына сай өнер көрсеткен Әли Жанғасинов болды. Екі шекті домбыраның қасиетін ұғып, құдіретін таныған оғланымыз көргенді қызықтырды, тыңдағанды тәнті етті. Ол ойнаған күй Егінбұлақтағы қызылжалдың самалындай есті, Кіндіктінің айдынындай толқыды. Сарсүйектен көтерілген күндей нұрланды, айсәулесіндей Сарыбасқойды аялап, Апрымның төбесіндегі жазғы түнгі жұлдыздай жамырады. Аудан өнерін әлемге паш етер өнерлі төрттікке сәт сапар тіледік.

ҚАЙРАТ БЕСБАЙЫС

Пікір: