1 ақпан күні ауданымыздағы байырғы мектептердің бірі - Абай атындағы мектеп-балабақша кешені жанындағы хоккей қорабының мұз айдынында «Нұр Отан» партиясы Көкпекті аудандық филиалы, «Жас Отан» жастар қанатының және аудандық білім беру, спорт және денешынықтыру бөлімінің бастамасымен жасөспірімдер арасында шайбалы хоккейден жолдастық кездесулер өткізілді. Кездесуге Мамай, Көкпекті, Теректі және айдын иелері Үлгілімалшы ауылдарының жас хоккейшілері қатысты. Шиеленіскен ойында үлгілімашылықтар басым түсіп бірінші жүлдені қанжығаларына байлады. Екінші орынды теректіліктер, үшінші орынды көкпектіліктер алды. Мамайлықтар мен үлгілімалшылықтардың кіші командалары «Үздік ойын көрсеткені үшін», «Белсенді қатысқаны үшін» аталымдарымен марапатталды. Жарысты жоғарғы деңгейде ұйымдастырған мектеп директоры Еркінбек Құсайыновқа, командалар жаттықтырушыларына, барлық қатысушыларға «Нұр Отан» партиясы Көкпекті аудандық филиалы төрағасының бірінші орынбасары Гүлбаран Ақшабаева алғыс білдірді.

Республикамыздағы «Үздік ауыл мектебі», Назарбаев зияткерлік мектебінің тәжірибесін пилоттық түрде енгізіп жатқан Үлгілімашылық Абай атындағы мектептің директоры Еркінбек Құсайыновтан хоккей туралы жалпы ойын бөлісуді сұрағанымызда:
- Шайбалы хоккей ойналатын мұз айдынының ұзындығы 51 - 61 м, ені 24 - 30 м, айнала шетінің биіктігі 1,10 - 1,22 м етіп қоршалған алаң. Алаңның дәл ортасынан қызыл сызық, ені 30 см, әр қақпадан 18 м қашықтықтан көк сызық тартылады. Қызыл сызық алаңды екіге, көк сызық үшке бөледі. Көк сызықпен бөлінген алаңының екі шеткісін қорғаныс алаңы, ортаңғысын орталық алаң дейді. Қақпа сызығының дәл ортасына ені 183 см, биіктігі 122 см қақпа қойылады. Ойын үш кезеңде, әр кезең 20 минуттан өтеді. Міне, дәл осы өлшемдерге сай етіп хоккей корды жасалды. Жалпы осы ауылда хоккейді 2000 жылдардан бастап үйрете бастадым. Дәл осы хоккей ойыны үшін 25 жылдық мамандығым – тарихшыны, денешынықтыру мұғаліміне де айырбастадым. Сырттай оқып мамандыққа сәйкес диплом да алдым. Үлгілімалшылық жас хоккейшілерді 5 сыныптан бастап дайындап, облыстық дәрежеде ойын көрсетіп жүлделі орын алуға дейін жеткіздім- деп сөзін аяқтады білікті басшы.
Аудан бойынша шайбалы хоккей ойыны бүгінгі күні Теректіде, Мамайда, Көкпектіде жақсы дамып келеді. Ал Үлкенбөкен хоккейі басқаларға үлгі болғанымен, жарыстарға көп қатыспайды. Басқа ауылдық округтерде ынталы ойыншылар бар болса да, оларды қолдаушылар жоқтығынан, не қораптары үлкен болып, мұз дұрыс құйылмағаннан, не үйлестіріп ұйымдастырар білікті басшы болмағасын жандандырып ойнау болмай тұр. Сонымен, ауданның кейбір ауылдарында қорап бар да, хоккей жоқ.

Қ.Мәлікаждар, Көкпекті ауылы

Пікір: