Көкпекті ауданындағы Балалар өнер мектебінің акт залында мүмкіндігі шектеулі балалардың шығармашылығына арналған «Жұлдыз-ай» респу-бликалық фестивалінің алғашқы іріктеу кезеңі өтті. Оған ауылдық округтер бойынша 18 бала қатысты.
Фестивальдің мақсаты даму мүмкіндіктері шектеулі балалар мен жасөспірімдер бойында әлеуметтік белсенділікті, шығармашылық қабілеттерін дамыту, фестивальға қатысушы әр баланың ерекше жеке шығармашылық әлеуетінің қалыптасуына және ашылуына қолдау көрсету болып табылады. Көкпекті аудандық білім беру және денешынықтыру, спорт бөлімі, Балалар өнер мектебінің қолдауымен өтіп жатқан шараның іріктеу турына қатысқандар - аудандық әлеуметтік қызмет көрсету орталығының балалары. Бұл кезеңде балалар хореография, вокал, аспапта орындау,

бейнелеу өнері бойынша жарысты. Олардың өнерлеріне әділ бағаларын берген әділқазылар Ш.Таныбаева, А.Шарифулина, З.Тұрлыбаева және Г.Оразғалиева болды. Іріктеу кезеңінің соңында қатысушыларға мадақтама қағаздар және Көкпекті ауылындағы жеке кәсіпкер Рауфа Беспаеваның демеушілігімен тәттілер мен сыйлықтар тапсырылды.
Балалардың өнері бір-бірінен асып түседі, дегенмен де солардың ішінде әлеуметтік орталықтың тәрбиеленушілері Виктория Бровко, Кирилл Бойченко, Маржан Әлбекова және №1 Самар орта мектебінің оқушысы Лидия Меццель, Бастаушы ауылының Абай атындағы орта мектептен Дінислам Ғаббасов, педагогикалық-психологиялық түзету кабинетінің оқу-шысы Расул Жанбаев, Көкпекті орта мектебінен Дильнара Мұратовалардың өнерлеріне көргендер тәнті болды.
«Жұлдыз-ай» фестивалі - бұл балалардың және шығармашылықтың, жан жылуы мен достықтың, мейірімділік пен шынайылықтың, дарындылық пен оптимизмнің мерекесі. Өйткені, ерекше балалар үшін айналадағы адамдардың махаббаты мен жылылығын сезіну өте маңызды!

Клара ҚАЙЫПЖАНҚЫЗЫ

Пікір: