Тамыздың 17-19 күндері Алматы қаласында 2002-2003, 2004-2005, 2006 жылғы жасөспірімдер арасында үстел теннисінен Республикалық дәрежедегі турнир болып өтті. «Шаңыраққа жол» деген атпен өткізілген спорттық додаға Қазақстанның 9 облысынан келген теннисшілер қатысып, мәреге Алматы және Қарағанды қалаларының спортсмендері шықты.

Шығыс Қазақстан облысынан біздің жас теннисші Дарын Кеңесханов қатысты. Ол жақсы ойын көрсетіп қана қоймай, жасөспірімдердің арасында бірінші орынды қанжығасына байлады. Дарын бұл турнирге қатысу үшін, арнайы «Шаңырақ» оқу-жаттықтыру мектебінде жаттықты. Мұнда ол Қазақстан Рес-публикасы Федерациясының білікті теннис жат-тықтырушыларынан арнайы жаңа заманауи техникаларды үйреніп дәріс алды. Аталмыш турнир барысында өнер көрсеткен балалар өздерінің ептіліктері мен көз ілеспес шапшаңдықтарын, шеберліктерін көрсетіп, жанкүйерлерін тәнті етті.

Олардың ішінен біздің Дарын өзін мықты ойыншы ретінде көрсетіп, Көкпекті ауданының мерейін асқақтатты.

Жеңіске жетіп ата-анасының, сыныптастарының үмітін ақтаған Дарынның жарысқа баруға қажетті жол қаражатын ата-анасы өздері көтеріп алды. Сонымен қатар, олар «Әшім-С» ЖҚС Т.Сағатовтың көрсеткен демеушілік көмегі үшін алғыс айтады. Өнерің үстем болсын, Дарын! Спорттағы бағындыратын асуларың биік болсын дегіміз келеді.

Бақыт ҒАББАСҚЫЗЫ 

Пікір: