Таяуда Көкпекті ауылының құрметті ақсақалы, тыл еңбеккері, ақын Жәлел Малғаждаровтың «Арнаймын бір сөз, халқыма...» атты өлеңдер жинағы жарыққа шықты.

Жәлел ата көп жылдар мал бағып, бақташы, шопан болған. Еңбек адамы-ның қарапайым тілі-мен өрілген ойлары көпшілікке арналып жазылған екен. Аталған кітаптың алғы сөзін Қазақстан Жазушылар Одағы ШҚО филиалының төрағасы Нұржан Қуантайұлы жазған.

– Жәлел Малғаждаровтың өлеңдері баспа бетінде алғаш рет жарық көріп отыр. Бұл жинаққа ақын жанды адамның туған жер, Отан, ерлік, даналық, Отбасы сынды тақырыпта жазған ой толғаулары енгізілген. Халық ауыз әдебиетімен үндестік, шығармалардың бірыңғай шұбыртпалы ұйқаспен жазылуы, қазақтың құлағына сіңісті болып кеткен фольклорлық оралымдарды өз қиялынша әрі қарай дамыту бұл – Жәлел Малғаждаров шығармашылығының басты ерекшелігі, – дейді Нұржан Қуантайұлы.

Сонымен қатар аталған кітаптың баспадан шығуына Арайлым Миратқызы мен Қайрат Малғаждаровтың сіңірген еңбектерін атап өтпеске болмас. Кітапқа басылатын ақын өлеңдерін электронды нұсқада Арайлым Игембаева теріп, оны Қайрат Малғаждаров өңдеп, тақырыптарын құрастырып, редакциялаған.

Сөйтіп, аудан кітапханаларының сөресі тағы бір кітаппен толықты. Жерлес ақынымыздың жүрек толғанысынан шыққан өлеңдерін оқи жүрейік, ағайын!

Жанерке АБЫЛХАН

Пікір: