Ағымдағы жылдың 10 наурызында Астана қаласының 20 жылдығына орай, Шұғылбай ауылының тумасы, спорт ардагері Сазанбай Қожахметұлын еске алуға арналған баскетболдан аудандық турнир өтті. Турнирге Көкжота, Көкпекті аудандық халыққа қызмет көрсету орталығы, Ж.Шайжүнісов орта мектебі, Бастаушы және Шұғылбай ауылының командалары қатысты.
Жарыстың ашылу салтанатында ауыл әкімі Қ.Алғазинов және Сазанбай Қожахметұлының інісі Төлеген Нұрғазыұлы құттықтау сөз сөйлеп қатысушыларға сәттілік тіледі. Тартымды өткен жарыста І орын Шұғылбай командасы, ІІ орын Көкжота жастары жеңіп алса, ІІІ орын Көкпекті аудандық халыққа қызмет көрсету орталығының командасы иеленді. Жарыс соңында спорт ардагерінің ұлы Айдын Сазанбайұлы жеңімпаз командаларды кубок, мадақтама және ақшалай сыйлықтармен марапаттады.

Сонымен қатар, ойын барысында «Үздік ойыншы» атағын иеленген халыққа қызмет көрсету орталығының команда ойыншысы Ерік Табиғатовқа, ардагер ағамыздың сыныптасы ауыл тұрғыны Дәметкен апамыз өз сыйапа-тын көрсетті. Ал, округтегі «Қажымұқан» ШҚ басшысы Жәлел Байназаров шұғылбай командасының ойыншысы, ауылдың белсенді жастардың бірі Қайрат Тілеужановқа «көрермен көзайымы» дегендей ақшалай сыйлық жасады. Ерікке ақшалай сыйлық, мадақтама, кубок табысталды. Спорт ардагерін еске алу турниріне арнайы келген жарыс қонақтары Бақыт Құнанбаев пен Айдын Сазанбайұлы мектепке ойын доптарын тарту етті.

Д.Мұсағазинов, жастар саясаты маманы

Пікір: