Жерлесіміз «Көкпекті жолдары» ЖШС директоры Гүлназ Нұрғалиева «АруАна» бизнесте танылу сыйлығының жеңімпазы атанды. Кәсіпкер әйелдердің экономикалық белсенділігін ынталандыру мақсатында тағайындалған республикалық сыйлық Шығыс Қазақстан облысы бойынша бірінші рет беріліп отыр. Жеңімпазға диплом мен мүсіншіні «Атамекен» ҚР ҰКП іскер әйелдер кеңесінің ШҚО бойынша төрайымы Елена Березинская-Абилова, ШҚО Кәсіпкерлер палатасы директорының орынбасары Әлия Мұқашева табыстады.
20 жылдан бері Көкпекті ауданында жұмыс істеп келе жатқан «Көкпекті жолдары» ЖШС әрбір аудан тұрғынына жақсы таныс. Көкпектіліктер ерекше қадірлейтін, құрметпен еске алатын ел ағасы Құдайберген Нұрғалиев іргетасын қалаған кәсіпорын табысты жұмыс істеумен қатар жергілікті тұрғындарды тұрақты жұмыспен қамтып келеді. Жол салу, күрделі жөндеу жұмыстарын жүргізу бағытында маманданған «Көкпекті жолдарының» арнайы техникасы қысы-жазы бір тынбай аудан жолдарын қардан тазалап, жөндеу жұмыстарымен айналысуда. Әке жолын жалғап, кәсіпорынның қызмет көрсету аясын кеңейткен Гүлназ Құдайбергенқызы 10 жылдан астам уақыт бойы кәсіпорынға шебер басшылық етуде.

Өз саласының білікті маманы ретінде танылған Гүлназ Құдайбергенқызы көкпектіліктерге әлеуметтік жауапкершілігі жоғары басшы ретінде де жақсы танымал. Ауданның қоғамдық өміріне белсенді араласып, түрлі мәдени-спорттық іс -шараларға демеушілік танытады. «Мектепке жол» акциясы аясында көпбалалы және аз қамтылған отбасыларды қажетті құрал-жабдықтармен қамтып, жыл сайын Жеңіс күнінде ардагерлерді ардақтауға атсалысады. «Нұр Отан» партиясы атынан аудандық мәслихат депутаты болып сайланған Гүлназ Құдайбергенқызының алдағы уақытта ауданымыздың дамуына зор үлес қосарына сенім мол.
Нәзік жанды арудың бұл қажырлы еңбегі елеусіз қалмады. Белсенді азаматтық ұстанымы мен еліміздің өркендеуіне қосып келе жатқан өлшеусіз үлесі үшін зор марапат иесі атанды. Бұл қуанышты күні республикалық деңгейдегі сыйлық иегерін марапаттау салтанаты өткізілді. Шараға аудан әкімі Серікқазы Садуақасов, «Атамекен» ҚР ҰКП іскер әйелдер кеңесінің ШҚО бойынша төрайымы Елена Березинская-Абилова, ШҚО Кәсіпкерлер палатасы директорының орынбасары Әлия Мұқашева, Көкпекті аудандық кәсіпкерлер палатасының директоры Бауыржан Артықбаев қатысты.
Сондай-ақ, шара барысында Көкпекті ауданының экономикасын дамытуға қосқан үлесі үшін бірқатар іскер әйелдер аудан әкімінің алғыс хатымен марапатталды. Раушан Нұрғалиева, Бибинұр Мұрсалимова, Зухра Қалиева, Валентина Гранкина, Толқын Сапарова, Надия Айдарова сынды кәсіпкерлер күнделікті қажырлы еңбегімен еліміздің өркендеуіне атсалысуда.

Пікір: