Қазақ елінің спортшылары үшін қашанда әлемдік додада топ жару – қанына біткен қасиетпен тең. Қай байрақты бәсекені алып қарасақ та, елдің беделін биікке көтерер спорт саңлақтардың саны жетіп артылады. Олардың арасында біздің ауданнан жасындай жарқырап жүрген, астын сызып тұрып көрсететін есімдердің де аталып жүргені баршылық. Оған айқын дәлел болатын ауданымызға қарасты Көкжайық ауылдық округінің тумасы, жерлесіміз, спортқа жаны құмар, өмірге деген құштарлығы ерекше байқалатын Данияр Әлібекұлы Қайсановты айтуға болады.

Кіл мықтылар бақ сынасатын бұл жарыс Үндістан астанасы Нью-Делиде өткізілді. Күрес түрлерінен өтіп жатқан Азия чемпионатында біздің ауданымыздың мақтанышы Данияр Қайсанов та болды. Жалауын көтерген Азия чемпионаты көптеген спорт түрін қамтыды. Ал біздің Данияр әр кезеңнен сүрінбей, қарсыластарын шаң қаптырды.
74 келіге дейінгі салмақта белдескен балуан Данияр Қайсанов жарыс барысында қарсылас шақ келтірмеді. Шешуші кездесуде ол Үндістан спортшысын 3:1 есебімен жеңіп, еркін күрестен ел қоржынына алғашқы алтынды салды. Ол жартылай финалда жапон балуаны Даичи Такатаниді, ширек финалда ирактық Карам Шакирді ұтты.

Айта кетерлігі, Данияр Қайсанов былтыр Қытайдың Сиянь қаласында өткен құрлықтық біріншілігінде жеңімпаз атанған болатын. Сондай-ақ, Нұр-Сұлтанда өткен әлем біріншілігінде 74 келіге дейінгі салмақта Олимпиада лицензиясына иелік етті.
Жалпы, бұл Азия чемпионатында аудан мақтанышы Данияр үшін тілеулес жандар көп болды. Өз кезегінде Даниярдың әкесі Әлібек Қайсанұлы Нүкенов осы байрақты бәсекеге қолдау көрсетіп, атсалысқан Көкжайықтық жерлестері Марат, Болат Бекбердиновтерді және барлық демеушілік көрсеткен жомарт жандарға ерекше алғысын жеткізеді.
Даниярдың келешекте әлі талай дүбірлі додада дүлдүлдер қатарынан көрінетініне сеніміміз мол. Қазақ жұртының мерейлі мақтанышы бола беруіне тілектеспіз! Алдағы уақытта Токиода өтетін олмпиадада саған тек сәттілік серік болсын дейміз!

Клара ҚАЙЫПЖАНҚЫЗЫ 

Пікір: