Маусым айының 4 күні Көкпекті ауданының белсенді жастары Қазақстан Республикасының Рәміздер күніне тарту ретінде авто шеру және вело шеру ұйымдастырды. Көкпекті жастар орталығының бастамасымен жиналған жеңіл автокөліктер Қазақстан Республикасының көк туын желбіретіп, Көкпекті ауылының орталық алаңынан бастау алды.

2007 жылы Қазақстан Республикасы Президентінің Жарлығымен 4 маусым күні Мемлекеттік рәміздер күні болып жарияланды. Жыл сайын бүкіл еліміз бұл күнді салтанатты түрде тойлап, мемлекеттіліктің маңызды атрибуты – Ту, Елтаңба және Әнұранға құрмет көрсетеді.
Еліміздің егемендігі мен тәуелсіздігін бар әлемге паш етіп, мемлекетіміздің өткені, бүгіні және болашағы арасындағы сабақтастықтың жарқын бейнесіне айналған мемлекеттік Рәміздеріміз бойына бар болмысымызды сыйғызып, тарихымызды көрсетіп тұр.Өткен аптада ауданымызда Қазақстанның жаңа тарихының қастерлі беттерін ұлықтаған аталмыш мереке абыроймен аталып өтті.
Мерекеге атсалысушылар тізгіндеген бірыңғай ақ түсті темір тұлпар көк байрағымызды желбіретіп, Көкпекті ауылының көшелерінде автошеру ұйымдастырды. Шеруді балалар және жасөспірімдер спорт мектебінің тәлім алушылары патриоттық марафонмен жалғастырды. Шара соңында барлық қатысушылардың куә болуымен ауданымыздың кіре беріс қақпасына Ту ілінді. Туды ілу құрметіне Азия Чемпионы Анатолий Бойков пен қола жүлдегері Рахат Байсақалов ие болды. Өз тұғырына орнап, бір қалыппен көкке көтеріліп бара жатқан тумен бірге ұлттық рухымыз да жоғарылай түсті.
Жиналған қауымға аудан әкімінің орынбасары Даурен Қойгелдин, облыстық жастар ресурсы басқармасының директоры Арайлым Есімбекқызы құттықтау сөзін арнап, қатысушыларға өз алғысын білдіріп автошеруге қатысушы жастарды мерекемен құттықтап, ізгі тілектерін білдірді.
Патриоттық іс-шаралар легі бұнымен де аяқталған жоқ. Ауданымыздың негізгі қуат күшін құрайтын жастар тобы ауданның төлқұжатына айналған Толағай тауына бет алды. Мақсаттары – тау шыңына да Туымызды көтеру. Толағайдың биігін бірге бағындырған ұйымшыл жастар қатарында аудандық Жастар орталығы, «Жасыл ел» жасақтарының сарбаздары және «Көкпекті жастары» патриоттық ұйымының жастары болды.Сондай-ақ, вело шеруге қатысқан жас балғындарымызға тәтті балмұздақ беріп демеушілік көрсеткен жеке кәсіпкер Надия Айдароваға алғысымыз шексіз.
Мемлекеттік рәміздер – ел тәуелсіздігін күллі әлемге жария етуші әрі халқымыздың рухын, ұлттық салт-санасын, қаһармандығы мен даналығын, болашаққа үміті, арман-тілегін жеткізетін ерекше құнды белгілер. Еліміздің ежелден аңсаған Тәуелсіздігіне қол жеткізіп, қазақ ұлтының салт-дәстүрі мен әдет-ғұрпының қайта жаңғыруы, мемлекеттік рәміздердің бекітілуі – болашақ дамуға бет алған егемен еліміз үшін ерекше құбылыс. Сондықтан рәміздерді қастерлеу – азаматтарымыз үшін басты міндет болып табылады. Рәміздер күні әр аймақта өткен іс-шаралар осы міндеттің маңыздылығын айшықтай түсті.

Пікір: