1979 жыл 25 желтоқсан және 1989 жыл 15 ақпан. Бұлар тарихта қанды ізі, сан жүректе жазылмас жарасы қалған жылдар мен күндер.15 ақпан ерекше күн, біз бұл күні ерлік пен батылдықтың өлшеусіз үлгісін көрсеткен барлық жерлестеріміз, Ауғанстанның отты жолдарымен өткен ержүрек жауынгерлер алдында тағзым етеміз.
Ауған соғысы ешқашан да естен кетпек емес. Сол соғыста Отан алдында берген анттарына адал болған, өздерінің батылдығы мен жанқиярлығын паш еткен ұлдарын, борыштарын мүлтіксіз атқарған азаматтарды құрмет тұту әрқайсымыздың борышымыз.
Бүгінгі күні ортамызда жүрген ауғандық жауынгерлеріміз бейбіт өмірдегі жарқын істерімен, қоғамдық жұмыстарға белсенділіктерімен, түрлі кәсіпті игерудегі ерен еңбектерімен ерекшеленуде. Олар өскелең ұрпақ үшін отансүйгіштік пен патриоттықтың жарқын үлгісі болуда. Сонау Ауған жерінде қару асынып, мұң арқалаған сын сағаттарда бірін-бірі бауыр дескен азаматтар бүгінгі таңда ауданымыздың түкпір-түкпірінде еңбек етуде.

Уақыт алмасады, ұрпақтар өзгереді, бірақ Отанға сүйіспеншілік, қажырлылық, ерлік, жауынгерлік рухымыз өзгеріссіз қалады. Көкпектіліктер бүгінгі күні де өз Отанымыздың қорғаныстық қабілетін нығайтуға, Қазақстан халқының игілігі мен бейбітшілікті қорғауға лайықты үлесін қосуда.
Қымбатты Ауған соғысының ардагерлері!
Сіздер бейбіт күндерде еліміз бен туған өлкеміздің игілігіне адал еңбек етудесіздер. Бүгінгі күні де даңқты ерлік дәстүрлеріне адалдық пен патриотизм, қаһармандықтың лайықты үлгісі болып келесіздер. Өшпейтін Ерлік үшін шынайы көңілден шыққан алғысымызды қабыл алыңыздар.
Сіздерге шын көңілден денсаулық, тіршіліктің ұзақ та жарқын, алаңсыз күндерін, жан шуағын, жақын адамдарыңыздың қамқорлығы мен ықыласын тілейміз. Табыстар мен сәттіліктер мол болсын!

Р.Сағындықов, аудан әкімі
Т.Сарманов, аудандық мәслихат хатшысы

Пікір: