Ұлыстың Ұлы күні Наурыз мерекесін тойлауды Көкжайық ауылы бір апта бұрын бастап кетті. 17.03.2017 жылы Көкжайық ауылында Ардагерлер ұйымының 30 жылдық мерейтойына орай Көкжайық, Биғаш жəне Тассай ауылдары спортшыларының арасында қазақша күрестен жарыс өткізілді. Жарыста Көкжайық құрамасы бірінші орынды иеленді. Жүлделі орындарға мадақтама қағаздары жəне қаржылай сыйлықтар «Елім-ай» шаруа қожалығының басшысы Түсіпбай Миғражұлы Бекбердинов демеушілігімен тарту етілді.

Көкжайық орта мектебінде барлық сыныптар арасында «Қош келдің, Әз-Наурыз» атты мерекелік іс-шара өтті. Шараға қатысқан оқушылар да, ата-аналар да, мерекені ұйымдастырып жүрген ұстаздар қауымы да ұлттық нақышта киініп, мерекенің сəнін келтірді. Ата-аналар арасында «Орамал тастау» ұлттық ойынын, «Бесікке бөлеу» дəстүрін көрсетті. Сондай-ақ, мектепте ата-аналар назарына мерекелік концерт ұсынылып, əр сыныпта жайылған дастарханнан дəм татып, алғыстарын білдіріп тарасты. 21 наурызда ауылдық округте Көкжайық, Тассай, Мамай ауылдарының шабандоздарының қатысуымен көкпар өткізілді. Жүлделі бірінші орынды Тассай округінің шабандоздары тақымдады. Жеңімпаздар жəне үздік ойын көрсеткен ойыншыларды Көкжайық округі əкімі мадақтама қағаздармен, қаржылай сыйлықтармен марапаттады. 22 наурыз күні мерекеге сай безендірілген орталық алаңда округ әкімі Нұрбек Сүлейменовтың, Ақсақалдар кеңесінің төрағасы Болатжан Садықов атаның құттықтау сөзі, ауыл имамы Жұмабек Досбайұлының батасын алған жұртшылық мерекені бастап та кетті. Ұлыс күні концертте «Мирас» этно-мәдени әжелер тобы мерекелік шараға әннен шашу шашып, ұлттық салт-дәстүрді дәріптейтін көріністерін ұсынса, «Бөбек лүпілі» балабақшасының ұжымы тәрбиеленуші балалардың өнерін ортаға салды. Ауыл жастары арасында қазақша күрес және гір көтеруден жарыстар өткізілді. Жеңімпаздар мадақтама қағаздарымен және демеушілердің ұсынған қаржылай сыйлықтарымен марапатталды. Әйелдер кеңесінің төраймы К.Жармұхамбетованың ұйымдастыруымен орталық алаңда барлық ауыл тұрғындарына арналған мерекелік дастархан жайылып, наурыз көже берілді. Ауыл ақсақалдары мерекеге жылы лебіздерін білдіріп, баталарын беріп, алғыстарын жеткізді. Мерекелік күн ауыл тұрғындарына арналған би кешімен мәресіне жетті.

Баршамызға Наурыз мерекесі құтты болып, еліміздің егемендігі мен тыныштығы арта берсін!

Н.Жұмабекқызы, жастар ісі жөніндегі маман

Пікір: