Әне, міне дегенше үш ай жаздың қалай өткенін де байқамай қалыппыз. Енді аз күнде мұғалімдердің дәстүрлі Тамыз мәслихаты өтеді. Оның ар жағында жаңа оқу жылы да босағадан сығалап тұр. Қазірдің өзінде республикадағы барлық білім ошақтарында жаңа оқу жылына дайындық қызу жүріп жатқаны айтпаса да түсінікті. Осы орайда, Көкпекті ауданының білім беру және денешықтыру, спорт бөлімінен ақпарат алған едік.

Алынған мәліметтерге сүйенсек, аудан бо-йынша жаңа оқу жылына құшағын айқара ашқалы тұрған 37 білім ошақтары бар, яғни оның ішінде 21 орта мектеп, 11 негізгі, 5 бастаушы, 6 балабақша, 2 балалар мен жасөспірімдердің спорт мектебі. Бөлім басшысының айтуынша, барлық білім ордаларының жаңа оқу жылына дайындық жұмыстары 100 пайызға орындалған. Бүгінгі күні мектептерді тексеруге құрамында 6 кісі бар арнайы комиссия құрылып, аралап жүр.
Сонымен қатар, биыл білім ордаларында «Жұмыспен қамтудың жол картасы-2020» мемлекеттік бағдарлама аясында, 94886,0 теңге қаражат бөлініп, 6 мектепке жөндеу жұмыстары жоспарланған. Атап айтсақ, «Октябрь мектеп-балабақша» кешенінің шатырын күрделі жөндеуге, Көкпекті орта мектебінің спорт залын, Қ.Аухадиев атындағы орта мектептің шатырын, Романовка негізгі мектебіне ағымдағы жөндеу жұмыстары, Шәріптоғай негізгі мектебінің спорт залын, Куйбышев негізгі орта мектебінің шатырын жөндеу жұмыстарына қаржылар бөлініп, мердігерлермен жұмыс жүргізілді. Барлық жөндеу жұмыстары берілген мерзімде аяқталуы тиіс. Қазіргі таңда тек қана Ажа ауылы және Теректі ауылдық округіндегі мектептерде мәселе шешілуде.
Сонымен бірге, Қазақстан Республикасының Білім және Ғылым Министрлігінің бастамасымен тұрмысы төмен отбасылардан шыққан балаларды қолдау мақсатында елімізде «Мектепке жол» акциясы басталған-ды. Қазірдің өзінде біздің аудан бойынша барлығы 1104 балаға, 5 млн. 699 мың теңге көлемінде көмек көрсетілмек. Барлық мектептерде, осы акция аясында жұмыстардың жоспары бекітілген. Бұл акцияға барлық мекемелер, әкімшілік, шаруа қожалықтары, кәсіпкерлер атсалысуда.
Міне, ауданымыздағы білім мекемелерінің жаңа оқу жылына дайындық барысы осылай. Жақсы жаңалықтар да жетерлік. Тек балаларымыз осы жақсылықтардың үдесіне сай болса игі.

Клара ҚАЙЫПЖАНҚЫЗЫ

Пікір: