Мемлекеттің іргетасы – үлгілі шаңырақтан басталады. Сондықтан да отбасы институтын нығайту Елбасымыз қойып отырған басым міндеттердің бірі. «Қазақстан-2050» Стратегиясында отбасы мәселелеріне, оның мәртебесінің артуына көп мән беріліп отыр. Осыған орай, Қазақстан Республикасы Президенті Н.Ә.Назарбаевтың 2013 жылғы 1 нау-рыздағы № 3827 Жарлығымен қыркүйек айының екінші жексенбісі Отбасы күні деп белгіленген болатын.

Қоғамда отбасы құндылығын дәріптеу арқылы сыйлы отбасыларды үлгі етуі ұрпақты ізгілікке тәрбиелеуде маңызы зор. Осындай отбасылар қатарына үлкенбөкендік үлгілі, тамырын тереңге жайған Қалдыбаев Қани ақсақалдың отбасы деуге болады. Бүгінгі біздің кейіпкеріміз Қани ата, өнегелі отбасында тәрбиеленіп, ұясынан қанат қаққан балапан – бүгінгі таңда өз алдына отау иесі, өзінің де балапандары өсіп-жетілуде. Қазіргі таңда, 75 жастың желкесіне мініп, жұбайы Мәулетхан Қалдыбаева екеуі Үлкенбөкендегі үлгілі отбасылардың бірі және бірегейі деуге болады. Шаңырағы биік, өнегелі отбасының ірге тасы қаланғанына биыл 53 жыл. Қани ата жас кезінен мал бағып колхоз, совхоз кезінде еліне еңбегі сіңген азаматтардың қатарында болды. Қазіргі таңда 53 жыл отбасылық өмірінің ыстық-суығын бірге бөліскен Мәулетхан апа екеуі 8 бала, 17, немере, 3 шөбере сүйіп, шаңырақты мәуелі бәйтерекке айналдырып отыр. Бүгінгі күні өздері де қазақтың салт-дәстүрімен келін түсіріп, құда-құдағи атанып, келінге қайын ата, қайын шеше болып отырған жайлары бар. Еңбек жолында қиын да қызықты күндер, тартыс, күрес – бәрі де болды. Бірақ, қиындыққа шыдамды, жақсылыққа құмар болуды әрқайсысы өз отбасында сезініп, біліп өскен ерлі-зайыптылар, біршама істің басын қайырды. Мәулетхан апа үйде бала тәрбиесімен бірге, Қани атаға тірек боп сауда саласында өз ісін ашып еңбек етті.
Мемлекеттің негізі отбасы десек, сол отбасы қандай болса, мемлекет те сондай болады. Өйткені, отбасында татулық пен береке, бірлік болса, әдептілік болса, ондай отбасында тәрбиеленген бала да келешекте елінің, қоғамның, тіпті болмағанда өзінің жүрген ортасының қадірлісі болары анық. Бүгінгі біздің үлкенбөкендік Қани ата мен Мәулетхан апанының отбасын кейінгі өскелең ұрпаққа үлгі етеміз. Мерейлі отбасы, сіздердің отбасыңызда әрдайым сыйластық, береке-бірлік болсын!

Пікір: