Ұстаз - жас ұрпақтың рухани сәулеткері, қоғам, халық өзінің үміті мол болашағын тапсыратын сенімді өкілі. Олар сол сенімді ақтай отырып, зерделі де зерек, парасатты, ұлттық және адамзаттық құндылықтарды бойына дарытқан тұлғаларды тәрбиелеуде.

Міне, осындай ардақты ұстаз, 19 жыл мектеп қабырғасында еңбегін сіңірген, Тассай ауылдық округының тұрғыны Жұлдыз Баймамырованы айта кеткім келеді. Жұлдыз апай , 6-11 сыныптар аралығында сабақ жүргізетін тарих пәнінің мұғалімі. Мектеп ішінде сабақ беріп қана қоймай, қоғамдық жұмыстарға белсенді түрде атсалысады.

–Мектепте дарынды балалармен жұмыстар жүргізіліп жатыр. 3 жыл бойы дайындаған ғылыми жобаларды ауданға жіберіп, оқушыларымызды сайыстарға қатыстырып, Семей, Өскемен қалаларынан жүлделі орындарды қанжығамызға байлап жатырмыз. Солардың ішінде мына оқушыларды ерекше мақтанышпен айта кеткім келеді: Арника Адылғазынова Өскемен қаласына барып, шығармалар сайысынан II дәрежелі дипломмен, аудандық Махамбет оқуларынан I жүлделі орынмен оралды. «Ұстазы жақсының, ұстамы жақсы» демекші, Арниканың жеңіске жетуі жетекшісі Г.Мұхаметқалиеваның арқасында деп айтсақ артық емес. Сондай-ақ, Д.Сайфоллаев пен Д.Құдайбергенова Семей мемлекеттік Педагогикалық институтында ардагерлерге байланысты жобаларын қорғап, II орынға ие болды. А.Дауытқанова аудандық Абай оқуларынан I орын алып келді. Бұл оқушылар біздің мектебіміздің мақтанышы.

Пікір: