Бала тәрбиесі - ана сүтінен басталып, біреудің біреуге ықпалы арқылы өмір бойы қалыптасатын күрделі құбылыс. Тәрбиенің ең алғашқы бастамасын отбасында алса, жалғасы балабақшамен байланысады, яғни бала тәрбиелене отырып білім алады. Сондықтан ата-ана мен балабақша арасындағы ынтымақтастықты дамыту өзекті мәселе болып отыр.
Шағын орталық пен отбасындағы ынтымақтастықты біріктіру арқылы оқу және тәрбиелеу жүйесін ұйымдастыру, ұжымдыққа, сыйластыққа баулу мақсатында 26 сәуір күні Шәріптоғай негізгі мектебінің шағын орталық ата-аналарының «Шағын орталық пен отбасының қарым-қатынасы» тақырыбына дәстүрден тыс ата-аналар жиналысы өтті.

Танымдық практикум түрінде ұйымдастырылған кездесу жылулық шеңберінен басталды. Ата-аналар бір-біріне жылы сөздер айтып, көтеріңкі көңіл-күй орнатты. Жиналыс барысында ата-аналар өз балаларының қандай түспен сәйкес екенін ойланып, гүлдер трафаретін бояды. Тәрбиеші отбасы мен мектепке дейінгі ұйымның бала оқыту мен тәрбиесіндегі рөліне тоқталып, «Ағаш бөлшектері» тренингін өткізді. Ағаштың тамыры – отбасы, діңі – тәрбиеші, жапырағы – балалар екені; тамырынан нәр алып, діңгегі мықты болса, жапырағы жайқалып, ағаш та жемісін береді деген кездесу қатысушылары қорытынды жасады.
Тәрбиеші шағын орталықта атқарылып жатқан жұмыс түрлерімен таныстырып, білім берудің бес саласы бойынша ата-аналармен шеберлік сыныбын өткізіп, үй жағдайында балалармен атқаруға болатын жұмыс түрлерін ұсынды.
«Микрофон» тәсілімен ұйымдастырылған кері байланыс кезінде ата-аналар Шағын орталықтың жұмысына оң баға беріп, келешекте бүлдіршідердің талай-талай биік шыңдарын бағындыратынына сенімділік білдірді. Ол үшін отбасы мен білім беру мекемесі бірлесе отырып, балаларды оқу мен тәрбиеге баулуда жаңа заманның тұлғасы етіп тәрбиелеп шығару үшін әлі де тығыз байланыста, шығармашылықпен жұмыс жасаймыз.

Р.Ақжігітова, Шағын орталық тәрбиешісі

Пікір: