Кітапты іздеп жүріп оқитын кездер тарихта қалып, орнын ғаламтор билеген заманда, халықтың кітап оқуға ынтасын арттыруға жаңа әдіс – тәсілдер мен заманауи көзқарас қажет.
Аудандық кітапхана қызметкерлері нағыз білім қайнарының мәртебесін қайтару мақсатында жылжымалы кітапхана қызметін қарқынды түрде жүргізіп отыр. Кітапханашылар әр мекемелерге, зейнеткерлер мен Ұлы Отан соғысы ардагерлерінің үйлеріне барып, жаңадан түскен кітаптармен таныстырып, өзіне ұнаған кітаптарын жаздыртып алуға мүмкіндік береді. Жылжымалы кітапхана кітапханаға келуге мүмкіндігі жоқ оқырмандарды сұранысы бойынша кітаппен қамтамасыз етеді. Кітапханашылар оқырмандарымен тығыз қарым – қатынаста жұмыс жасайды, әр айда уақытылы кітаптарды апарып алмастырады.

Егер де сіз кітапханаға келмесеңіз, онда кітапхана сізге барады деген мақсатта бүгін Ұлы Отан соғысының ардагері Петр Цепковтың шаңырағына барып ардагердің қалауы бойынша Қасым Аманжоловтың өлеңдер жинағын, Әбдіжәміл Нүрпейісовтың «Қан мен тер» романының орысша аудармаларын апардық. Зейнеткер 100 жасқа таяған Бағила Тыныбаева апамызға да республикалық журналдар мен «Абай жолы» роман-эпопеясын сұранысы бойынша апарып бердік. Бұл іс-шара кітапханаға оқырман тартудың ең тиімді әдісі болады. Кітапханашылар жаз кезінде саябақтар мен гүлзарларды, әрбір үйді аралап оқырмандарға кітап таратты.
Отбасындағы оқырмандарды аралау барысында «Нұр Отан» партиясының мүшесі Қайрат Малғаждаров, Көкпекті аудандық кітапханасының оқырмандар залының кітапханашысы Светлана Чернова және аудандағы тәжірибелі кітапханашы, аудандық кітапхананың директоры Айтжамал Ибраева болды.

Пікір: