Аудан орталығының іргесінде орналасқан Ажа ауылы соңғы жылдары тың тыныс алып, жаңа жобалармен жаңғырып келеді. Бұған себеп ауылда атқарылып жатқан игілікті істер. Жарқын жобалар мен игілікті істердің қайнар көзі  - ауыл халқының ауызбіршілігі.

Ауыл жастары былтырғы жылы өз күшімен шағын футбол алаңы мен балалар ойын алаңын салып берді. Биылғы жылы ауыл орталығынан еңселі мәдениет үйі бой көтерді. Қазіргі уақытта құрылыс жұмыстары қызу жүргізіліп жатыр. Бұл істердің ұйытқысы болып жүрген ауылдың атқамінер азаматтары. Елжанды азаматтар Қайрат пен Данияр бастаған Ажа жастарының ісіне қазіргі күні бүкіл жұрт сүйсіне қарайды, тамсанады.

16 тамыз күні аудан әкімі Ділдәбек Оразбаев Ажа ауылына жұмыс сапарымен барып, салынып жатқан мәдениет ошағының құрылысымен танысты. Ауылдық округ әкімі Қайрат Алғазиновқа құрылыс барысына барынша қолдау көрсету туралы тапсырма берді.
Мектеп директоры Әділбек Қаусовпен Ажа ауылында балабақша ашу мәселесі талқыланды. Былтырғы жылы Ажа ауылының тұрғындарымен кездесуде жергілікті халық тарапынан аудан басшысына бүлдіршіндерді балабақшамен қамтамасыз ету мәселесін көтерген еді. Білім бөлімінің басшысына тиісті тапсырмалар беріліп, бүгінгі күні мақсатты жұмыстар жүргізілуде. Нақты айтар болсақ, ғимарат сатып алынып, жөндеу жұмыстары атқарылуда.
Қыркүйек айының 20 жұлдызында Ажа ауылының шағын орталығын ашу жоспарланған. Шағын орталықта 20 бүлдіршін қамтылады деп күтілуде.

Пікір: