Міне, мол өнімімен қуантып күз де келді. Егін орылып, бау-бақша өнімі жиналып, ауыл тұрғындары қыс қамын жасап жатыр. Бірақ, бәрінде бірдей бақша бола бермейді, бар болса онда көкөніс өсіруге шамасы келмейтіндер де бар. Күзгі жәрмеңкенің пайдасы осындайда аса қажет. Жылдағы дәстүр бойынша ауданда әр сенбі сайын ауылшаруашылығы жәрмеңкелерін өткізу қайта оралды.
Өткен сенбі күні Самар ауылының орталығында биылғы жылдың алғашқы жәрмеңкесі қанат жайды. Ауыл тұрғындары өздерінің артық өнімдерін базарға ұсынды. Біздің өңірде бақша салуды кәсіп ететін кәсіпкерлер де баршылық. О.Ким, Л.Ким, Тұрсын Мұса, М.Зүлфиев әкелген картоп, сәбіз, қызанақ, қауын-қарбыз, пиязды тұтынушылар арзан бағамен лезде сатып алды.

Сарыбел, Бастаушы, Миролюбовка ауылдық округінің өкілдері сүт өнімдерін, тұздалған көкөніс, бал ұсынды. Олардың әкелген қолөнер бұйымдары да өз иелерін тапты. «Рыбпром» ЖШС-ның дайын өнімдері қашанда үлкен сұранысқа ие. Сондықтан да олардың сатушылары көп бөгелген жоқ. Бұл күні ет өнімдері де мол болды. Кәсіпкер С.Баженов семіз сиыр еті мен тартылған ет сатты. Жәрмеңкеге сонау Талдықорғаннан келген кәсіпкерлер де қатысып, апорт алмасын саудалады.
Күздің берер сыйы мол. Алдағы болатын жәрмеңкелерге орақ науқанынан босаған шаруа қожалықтары да қатысып, шөп, жем, өсімдік майын арзан бағамен ұсынатын болады. Ашық, жайдары күнде әсем әуен ойнап тұрған райда өткен жәрмеңкеден халық қоржындары тоқ, көңілдері көтеріңкі болып қайтты. Ауыл тұрғындарын алдағы сенбіде тағы да өтетін жәрмеңке күтетін болады.
Клара НҰРПЕЙІСОВА

Пікір: