Көктемгі су тасқыны кезінде өзен, көл жағаларына жақын орналасқан елдімекендер, шаруашылықтарды су басып кететіні белгілі. Су тасқыны күшті жауын, қардың тез еруі немесе өзенде сең жүрісі кезінде оның бір орынға жиналып кептелуі себебінен су деңгейінің көтерілуінен пайда болады.

«Апат айтып келмейді» деген халық нақылы бар. Биылғы жылдың көктем мезгіліндегі ауа

райының күрт жылынуы ауданның кейбір жерлерін біраз шығынға ұшыратты. Солардың бірі, Белое ауылдық округіне қарасты Жаңажол ауылы. Көктем мезгілінде ауыл көшелерін су шайып кеткен болатын. Сол олқылықты түзету үшін, жақында ауыл әкімі Мұхтар Жәңкебаевтың ұйымдастыруымен ауыл көшелеріне құм-тас төселді. Бұл аталмыш игі іске ауыл азаматтары Марат Құмаров, Нұрхат Шайкиев, Нұрболат Дүйсенбаев, Шәміл Рахимов, Қанат Вахасов, Ерлан Сейфуллин, Сержан Суланов сынды азаматтар белсене қатысып еңбек етті. Сонымен бірге, көшелерге құм-тас төсеуге 6 трактор және 1 жүк тиегіш техникалары жұмылдырылып 356 тонна қиыршық тастарды 107 рет тасыды. «Жұмыла көтерген жүк жеңіл» дегендей көзді ашып-жұмғанша екі көшедегі қызу жұмыс аяқталып кетті. Жоғарыда аталған ауыл азаматтары бұл шараға өз қаражаттарымен, ақысыз, туған ауылдарының көркейуіне үлес қосты. Жүректері «елім, жерім» деп соққан атқамінер азаматтарымыздың бүгінгі таңдағы бастамалары болашақ ұрпаққа үлгі болсын.

Клара ҚАЙЫПЖАНҚЫЗЫ

Пікір: